Британия иқтисодиёти тобора ёмонлашмоқда — The Economist
Август ойининг илк ҳафтасида Англия банки йиллик инфляция жорий йилнинг октябрь ойида 13 фоиздан сал кўпроқ ўсишини башорат қилди. Ушбу ўсишнинг камида ярми, асосан, Украинадаги уруш туфайли энергия нархининг кескин кўтарилиши билан боғлиқ. The Economist журнали Британия иқтисодиёти ёмонлашаётгани ҳақида хабар берди.
Cornwall Insight консалтинг компаниясининг ҳисоб-китоблари шуни кўрсатадики, Британияда уй хўжаликларининг ўртача йиллик энергия тўловлари ҳозирда 1971 фунт стерлинг (2380 доллар) атрофида. Бу ўтган йилга нисбатан сезиларли даражада ошиб, апрель ойида 4,427 фунт стерлинггача ўсиши мумкин.
Халқаро валюта фонди таҳлиллари Британиядаги пастки қатлам вакиллари нархлар ўсишидан энг кўп азият чекишини маълум қилди. Камбағал аҳоли бойларга қараганда ўз бюджетининг кўпроқ қисмини энергияга сарфлайди.
Ҳаттоки қуйи қатламни энергия танқислигидан қандай ҳимоя қилиш масаласи Риши Сунак ва Лиз Трас ўртасидаги Консерватив партиянинг кейинги раҳбари бўлиш учун курашда устувор бўлиб турибди.
Англия банки 4 август куни фоиз ставкаларини ярим фоиз пунктга оширди. Бу 27 йил давомидаги энг катта ва кетма-кет олтинчи ўсишдир.
Банкнинг прогноз қилишича, уй хўжаликлари турмуш даражасининг ўнлаб йиллардаги энг катта пасайишига дучор бўлишади.
2023 йилда британияликлар учун солиқдан кейинги меҳнат даромадлари йиллик ставкада 4 фоиздан кўпроққа камайиши кутилмоқда.
Аввалроқ бутун дунё бўйлаб иқтисодий ўсиш секинлашгани ҳақида хабар берилган эди.
