Европанинг 2021/22 йилги мавсумдаги энг яхши ўйинчиси ва мураббийи номига даъвогарлар эълон қилинди

УЕФА 2021/22 йилги мавсум якунлари бўйича энг яхши футболчи ва мураббий номига даъвогарлар рўйхатини эълон қилди.

Энг яхши футболчи номига «Реал» ҳужумчиси Карим Бензема ва мадридликлар дарвозабони Тибо Куртуа, шунингдек, «Манчестер Сити» ярим ҳимоячиси Кевин де Брюйне даъвогарлик қилмоқда.

Энг яхши мураббий бўлишга номзодлар: Карло Анчелотти («Реал»), Пеп Гвардиола («Манчестер Сити») ва Юрген Клопп («Ливерпуль»).

Ўтган мавсум энг яхши ўйинчи номига «Челси» ярим ҳимоячиси Жоржиньо лойиқ кўрилган бўлса, лондонликлар устози Томас Тухель энг яхши мураббий бўлганди.

Ғолиблар номи 25 август куни бўлиб ўтадиган Чемпионлар Лигаси қуръа ташлаш маросимида эълон қилинади.