Туркия чемпиони Элдор Шомуродов борасида таклиф билан чиқди

«Рома» ҳужумчиси Элдор Шомуродов фаолиятини Туркия чемпионатида давом эттириши мумкин.

RomaPress хабарига кўра, «Трабзонспор» ўзбекистонлик футболчи борасида таклиф билан чиққан. Туркиянинг амалдаги чемпиони Шомуродовни ижарага олмоқчи ва бунинг учун Рим жамоасига 1 миллион евро таклиф қилган.

Бироқ римликлар Шомуродовни тўлиқ трансфер қилмоқчи, шунингдек, сотиб олиш мажбурияти билан ижара вариантини ҳам кўриб чиқишга тайёр.

Аввалроқ «Болонья» Шомуродовни сотиб олиш ҳуқуқи билан ижарага олиши ва айрим кўрсаткичлар қайд этиладиган бўлса, бу ҳуқуқ мажбуриятга айланиши ҳақида хабар қилинганди.

Шомуродов 2021 йилнинг ёзги трансфер ойнасида 18 миллион евро эвазига «Женоа»дан «Рома»га ўтганди. У «бўрилар»сафида жами 40 та ўйин ўтказиб, бешта гол ва олтита голли узатма амалга оширди.

Эслатиб ўтамиз, ушбу ёзда «Фотиҳ Карагюмрюк» сафига ўтган Отабек Шукуров Туркия чемпионатида майдонга тушган илк ўзбекистонлик футболчига айланганди.

Мавзуга доир: Видео: Римда ўзбекча қўшиқ садолари остида майдонга чиқиб келган Элдор Шомуродов (видео)