Шахмат олимпиадасида ғолиб бўлган Ўзбекистон терма жамоаси Тошкент халқаро аэропортида тантанали равишда кутиб олинди

Ҳиндистоннинг Ченнаи шаҳри мезбонлик қилган 44-Бутунжаҳон шахмат Олимпиадаси ғолибига айланган Ўзбекистон терма жамоаси бугун, 11 август куни тунда Тошкентга қайтиб келди. Бу ҳақда «Дарё» мухбири хабар берди.

Шахматчиларни Тошкент халқаро аэропортида уларнинг яқинлари, Ўзбекистон ҳукумати вакиллари, оммавий ахборот воситалари ҳамда мухлислар кутиб олди. 

Ўзбекистон президентининг шахматчиларга йўллаган табригини бош вазир Абдулла Арипов ўқиб эшиттирди.

Нодирбек Абдусатторов ҳам Олимпиада ҳақида ўз фикрларини айтди.

Шундан сўнг, шахматчиларга 600 млн сўмлик пул мукофотлари ҳамда «Equinox» автомашинаси калитлари топширилди.

Эслатиб ўтамиз, Ўзбекистон эркаклар терма жамоаси ҳал қилувчи турда Нидерландияга қарши баҳс олиб бориб, 2,5:1,5 ҳисобида ғалаба қозонган эди. Мазкур ғалаба орқали Ўзбекистон эркаклар терма жамоаси олтин медал масаласини ҳал қилган ва ўз тарихида илк бор Олимпиада чемпионига айланганди.

Шахмат бўйича Ўзбекистон аёллар терма жамоаси эса сўнгги турда Коста-Рика устидан ғалаба қозониб (2,5:1,5), олимпиадани 162 жамоа орасида 31-ўринда якунлаганди.