Ўзбекистонда давлат ташкилотларида ишлаш учун талабгорлар 50 баробар ортди. Бу ҳақда АОКАда бўлиб ўтган матбуот анжуманида Президент ҳузуридаги давлат хизматини ривожлантириш агентлиги директорининг биринчи ўринбосари Отабек Ҳасанов маълум қилди, дея хабар бермоқда «Дарё» мухбири.
Отабек Ҳасановнинг айтишича, ҳозирда битта бўш иш ўрнига 50 киши ҳужжат топширади ва уларнинг 49 нафари ўта олмайди.
«Авваллари битта вакант жой бир кишига тўғри келарди ва ўша одам ишга ўтиб кетарди. Энди бу вакант жой учун очиқ танлов ўтказилаётгани учун институтни битирган 50 нафар ёшлар ҳужжат топиширяпти. Халқ биздан профессионал хизмат сўраяптику тўғрими? Давлат хизматига профессионал кадрлар керак. Биз ҳам энди кадрларни саралаяпмиз. 50 кишидан 49 нафари ишга ўта олмаяпти. Бундан кейин давлат хизматига креатив, замонавий фикрлайдиган, профессионал кадрлар очиқ танлов асосида ишга олинади.
Давлат хизматига ёшларнинг кириб келиши 5 йил олдин 37 фоиз эди. Ҳозир бу кўрсатгич 61 фоизга чиқди. Оддий мисол, 5 йил олдин 59 минг нафар одам олий таълимга ишга кирарди. Бугун 170 минга яқин инсон бу тизимга ишга киряпти. Тасаввур қилинг, давлат хизматига қанча иш кучи кириб келяпти? Кўпчилик давлат хизматига ишга кириш осонлашадими дейди. Йўқ. Энди давлат ишига кириш қийинлашади», — деди агентлик расмийси.
Анжуманда Отабек Ҳасанов бугунги кунда қайси давлат ташкилотида ёшлар кўпроқ ишлаётганини ҳам айтиб ўтди.
«Давлат хизматчиларининг кўпчилиги ёши катталар деган танқидлар бўлади. Лекин нега ёшларни кириб келаётганига эътибор бермаймиз? Ҳозирда Ёшлар ишлари агентлиги ёш хизматчилари энг кўп давлат ташкилотдир. У ерда 9 минг 348 нафар давлат хизматчилари ишлайди. Бу йил давлат хизматида ёш бўйича ўртача кўрсатгич 22–25 ёш орасида бўлмоқда. Иккинчи ўринда ҳоким ёрдамчилари ичида ёшлар кўп», — деди агентлик вакили.
Изоҳ (0)