Жорий йилнинг 4 -5 август кунлари Тошкент вилоятидаги «Чирчиқ индустриал технопарки»да ҳудудий тармоқлараро саноат ярмаркаси ўтказилмоқда. Ҳар йили бўлиб ўтадиган шу каби кооперация ярмаркаларида Олмалиқ кон-металлургия комбинати фаол қатнашиб келади.
Айтиш жоизки, 2021 йилда Маҳаллийлаштириш дастури доирасида «Олмалик КМК»да 87 лойиҳа бўйича 161,4 миллиард сўм маҳсулот ишлаб чиқариш белгиланган бўлса, амалда 217,2 миллиард сўмлик маҳсулот бозорга чиқарилиб, режа 134,5 фоизга бажарилишига муваффақ бўлинган.
Давлатимиз раҳбарининг жорий йилнинг 24 январдаги «Республикада ишлаб чиқаришни ривожлантириш ва саноат кооперациясини кенгайтиришнинг самарали тизимини яратиш чора-тадбирлари тўғрисида»ги қарорига асосан, 2022 йилда «Олмалиқ КМК» АЖда 97 лойиҳа доирасида 208,7 миллиард сўмлик импорт ўрнини босувчи маҳсулотларни ишлаб чиқариш кўзда тутилган.
Яна бир аҳамиятли жиҳати шундаки, 2022 йилда маҳаллийлаштириш дастурига мувофиқ, 21 та янги турдаги лойиҳалар бўйича 25,2 миллиард сўмлик маҳсулотлар ишлаб чиқариш бошланган.
Шу йилнинг январь июль ойларида маҳаллийлаштириш дастури доирасида режалаштирилган 102 та лойиҳа бўйича ҳажми 129,2 миллиард сўмлик маҳсулотлар ишлаб чиқарилиши белгиланган бўлса, амалда 162 миллиард сўмни ёки режага нисбатан 125,4 фоизни ташкил этди ва ўтган йилнинг мос даврига нисбатан ўсиш суръати 143,1 фоизга оширилди.
Барча лойиҳалар бўйича режа кўрсаткичлари бажаришга эришилди ва 516,3 минг долларлик маҳсулот экспорт қилинди.
Бугунги кунда 32 та янги турдаги лойиҳалар бўйича 31,6 миллиард сўмлик маҳсулотлар ишлаб чиқариш ўзлаштирилди. Қаттиқ қотишмали маҳсулотлар – сверло ва фрезалар, тош майдалаш тегирмони қопламаси, юқори ҳароратга чидамли керамик маҳсулотлар, волфрам ангидриди, янчиш ускунасининг зирхлари, қуйма маҳсулотлар шулар жумласидан.
Жорий йилнинг январь-сентябр ойларида маҳаллийлаштириш дастури дорасида режалаштирилган 104 та лойиҳа бўйича ҳажми 171,3 миллиард сўмлик маҳсулотлар ишлаб чиқарилиши белгиланган, амалда 204,1 миллиард сўмни ёки режага нисбатан 119,2 фоизни ташкил этиши кутилмоқда. Январь декабрь ойларида маҳаллийлаштириш дастурида режалаштирилган 108 та лойиҳа бўйича ҳажми 236,9 миллиард сўмлик маҳсулотлар ишлаб чиқарилиши белгиланган, амалда 269,8 миллиард сўмни ёки режага нисбатан 113,9 фоизни ташкил этиши кутилмоқда. 2022 йил якуни бўйича импорт ўрнини босиш самарадорлиги 24,5 миллион долларни ташкил этиши кутилмоқда.
Комбинат томонидан тармоқлараро саноат ярмаркаси доирасида 2022 йилда кооперация шартномалари ҳажмини 560 миллиард сўмдан 900 миллиард сўмгача (160 фоиз) ошириш режалаштирилган. Жорий йилнинг 7 ойида янги 28 турдаги 184,9 миллиард сўмлик аввал мамлакатимизда ишлаб чиқарилмаган маҳсулотларни ўзлаштириш орқали харид шартномалари тузилди. Маҳаллий ишлаб чиқарувчилар билан биргаликда олиб борилган ишлар натижасида аввал импорт қилинган 130 турдаги маҳсулотларни маҳаллий ишлаб чиқарувчилар томонидан ўзлаштириш бўйича чора-тадбирлар режаси тасдиқланди.
Жумладан, ярмарка доирасида «Тошкент механика қуюв заводи» АЖ билан 72 турдаги, «Интер техно пром» МЧЖ билан 8 хил, «Апитекс» МЧЖ корхонаси билан 10 турдаги импорт ўрнини босувчи маҳсулотларни ўзлаштириш чора-тадбирлари тасдиқланди. Бандан ташқари, «Андижон механика заводи» ШК билан 25 миллиард сўмлик меморандум имзоланиши кутилмоқда.
Сўнгги йилларда мамлакатимизда иқтисодиёт тизимини либераллаштириш, ишбилармонлик муҳитини яхшилаш, қулай инвестиция шароитларини яратиш, саноат тузилмасини диверсификация қилиш, экспортни қўллаб-қувватлаш, импорт ўрнини босувчи товар ва маҳсулотларни ишлаб чиқаришни янада оширилиши давлат сиёсатининг устувор йўналишларига айланди.
Олмалиқ кон-металлургия комбинати ҳам ярмарка давомида тадбиркорлар ва маҳаллий ишлаб чиқарувчиларни ўзаро ҳамкорлик асосида ишлаш бўйича барча таклифларини кўриб чиқмоқда. Биз ишлаб чиқариш эҳтиёжимиздан келиб чиққан ҳолда янги турдаги импорт ўрнини босувчи маҳсулотларни ўзлаштириш бўйича амалий таклифларини қўллаб қувватлашга тайёрмиз.
Дилшод Холдаралиев, ОКМК маҳаллийлаштириш бўлими бошлиғи
Изоҳ (0)