Joriy yilning 4 -5-avgust kunlari Toshkent viloyatidagi “Chirchiq industrial texnoparki” da hududiy tarmoqlararo sanoat yarmarkasi o‘tkazilmoqda. Har yili bo‘lib o‘tadigan shu kabi kooperatsiya yarmarkalarida Olmaliq kon-metallurgiya kombinati faol qatnashib keladi.
Aytish joizki, 2021-yilda Mahalliylashtirish dasturi doirasida “Olmalik KMK”da 87 loyiha bo‘yicha 161,4 milliard so‘m mahsulot ishlab chiqarish belgilangan bo‘lsa, amalda 217,2 milliard so‘mlik mahsulot bozorga chiqarilib, reja 134,5 foizga bajarilishiga muvaffaq bo‘lingan.
Davlatimiz rahbarining joriy yilning 24-yanvardagi “Respublikada ishlab chiqarishni rivojlantirish va sanoat kooperatsiyasini kengaytirishning samarali tizimini yaratish chora-tadbirlari to‘g‘risida”gi qaroriga asosan, 2022-yilda “Olmaliq KMK” AJda 97 loyiha doirasida 208,7 milliard so‘mlik import o‘rnini bosuvchi mahsulotlarni ishlab chiqarish ko‘zda tutilgan.
Yana bir ahamiyatli jihati shundaki, 2022-yilda mahalliylashtirish dasturiga muvofiq, 21 ta yangi turdagi loyihalar bo‘yicha 25,2 milliard so‘mlik mahsulotlar ishlab chiqarish boshlangan.
Shu yilning yanvar-iyul oylarida mahalliylashtirish dasturi doirasida rejalashtirilgan 102 ta loyiha bo‘yicha hajmi 129,2 milliard so‘mlik mahsulotlar ishlab chiqarilishi belgilangan bo‘lsa, amalda 162 milliard so‘mni yoki rejaga nisbatan 125,4 foizni tashkil etdi va o‘tgan yilning mos davriga nisbatan o‘sish sur’ati 143,1 foizga oshirildi.
Barcha loyihalar bo‘yicha reja ko‘rsatkichlari bajarishga erishildi va 516,3 ming dollarlik mahsulot eksport qilindi.
Bugungi kunda 32 ta yangi turdagi loyihalar bo‘yicha 31,6 milliard so‘mlik mahsulotlar ishlab chiqarish o‘zlashtirildi. Qattiq qotishmali mahsulotlar – sverlo va frezalar, tosh maydalash tegirmoni qoplamasi, yuqori haroratga chidamli keramik mahsulotlar, volfram angidridi, yanchish uskunasining zirxlari, quyma mahsulotlar shular jumlasidan.
Joriy yilning yanvar-sentyabr oylarida mahalliylashtirish dasturi dorasida rejalashtirilgan 104 ta loyiha bo‘yicha hajmi 171,3 milliard so‘mlik mahsulotlar ishlab chiqarilishi belgilangan, amalda 204,1 milliard so‘mni yoki rejaga nisbatan 119,2 foizni tashkil etishi kutilmoqda. Yanvar-dekabr oylarida mahalliylashtirish dasturida rejalashtirilgan 108 ta loyiha bo‘yicha hajmi 236,9 milliard so‘mlik mahsulotlar ishlab chiqarilishi belgilangan, amalda 269,8 milliard so‘mni yoki rejaga nisbatan 113,9 foizni tashkil etishi kutilmoqda. 2022-yil yakuni bo‘yicha import o‘rnini bosish samaradorligi 24,5 million dollarni tashkil etishi kutilmoqda.
Kombinat tomonidan tarmoqlararo sanoat yarmarkasi doirasida 2022-yilda kooperatsiya shartnomalari hajmini 560 milliard so‘mdan 900 milliard so‘mgacha (160 foiz) oshirish rejalashtirilgan. Joriy yilning 7 oyida yangi 28 turdagi 184,9 milliard so‘mlik avval mamlakatimizda ishlab chiqarilmagan mahsulotlarni o‘zlashtirish orqali xarid shartnomalari tuzildi. Mahalliy ishlab chiqaruvchilar bilan birgalikda olib borilgan ishlar natijasida avval import qilingan 130 turdagi mahsulotlarni mahalliy ishlab chiqaruvchilar tomonidan o‘zlashtirish bo‘yicha chora-tadbirlar rejasi tasdiqlandi.
Jumladan, yarmarka doirasida “Toshkent mexanika quyuv zavodi” AJ bilan 72 turdagi, “Inter texno prom” MCHJ bilan 8 xil, “Apiteks” MCHJ korxonasi bilan 10 turdagi import o‘rnini bosuvchi mahsulotlarni o‘zlashtirish chora-tadbirlari tasdiqlandi. Bandan tashqari, “Andijon mexanika zavodi” SHK bilan 25 milliard so‘mlik memorandum imzolanishi kutilmoqda.
So‘nggi yillarda mamlakatimizda iqtisodiyot tizimini liberallashtirish, ishbilarmonlik muhitini yaxshilash, qulay investitsiya sharoitlarini yaratish, sanoat tuzilmasini diversifikatsiya qilish, eksportni qo‘llab-quvvatlash, import o‘rnini bosuvchi tovar va mahsulotlarni ishlab chiqarishni yanada oshirilishi davlat siyosatining ustuvor yo‘nalishlariga aylandi.
Olmaliq kon-metallurgiya kombinati ham yarmarka davomida tadbirkorlar va mahalliy ishlab chiqaruvchilarni o‘zaro hamkorlik asosida ishlash bo‘yicha barcha takliflarini ko‘rib chiqmoqda. Biz ishlab chiqarish ehtiyojimizdan kelib chiqqan holda yangi turdagi import o‘rnini bosuvchi mahsulotlarni o‘zlashtirish bo‘yicha amaliy takliflarini qo‘llab quvvatlashga tayyormiz.
Dilshod Xoldaraliyev, OKMK mahalliylashtirish bo‘limi boshlig‘i
Sheriklik huquqi asosida
Izoh (0)