Shavkat Mirziyoyev raisligida 4-avgust kuni mamlakat hayoti uchun g‘oyat muhim masala — davlat xizmatini isloh qilish bo‘yicha videoselektor yig‘ilishi boshlangani xabar qilingandi. Unda davlat rahbari har bir vazirlik va hokimlik kadrlar tanlashni oliygohlardan boshlashi zarurligini qayd etdi.
Ta’kidlanishicha, yil yakunigacha:
- barcha vakant lavozimlar ochiq yagona elektron platformaga joylashtiriladi;
- bo‘sh lavozimga tanlovda ishtirok etish uchun hozirgi kunda talab etilayotgan 16 ta hujjat so‘ralmaydi, barcha jarayonlar elektron shaklga o‘tkaziladi;
- ochiq tanlov orqali nomzodning bilimi, tajribasi va salohiyati aniqlanadi.
Buning uchun ikki oy muddatda oliygohlar diplomlari va mehnat daftarchalarini mavjud elektron bazaga to‘liq kiritib, uni Tanlov elektron platformasiga integratsiya qilish vazifasi qo‘yildi. Yil yakuniga qadar 4 mingta bo‘sh lavozimga tanlov o‘tkazish topshirildi.
“Har bir vazirlik va hokimlik kadrlar tanlashni oliygohlardan boshlashi zarur. Bu tajribani tizimli yo‘lga qo‘yish uchun har bir vazir va viloyat hokimi bir oy muddatda Yosh mutaxassislarni tanlash dasturini e’lon qiladi.
Dastur doirasida oliygohlarning bitiruvchi kurslarida o‘qiyotgan qobiliyatli yoshlar saralanib, vazirlik va hokimlik tizimida stajirovka o‘taydi va o‘qishni tamomlagach, tanlov asosida ishga qabul qilinadi. Bunda, nafaqat o‘zimizdagi oliygoh talabalari, balki nufuzli xorijiy oliygohlarda o‘qiyotgan yoshlarimiz ham qamrab olinadi”, — dedi prezident.
Izoh (0)