Биткоин нархи июлда муваффақиятли кўтарилгандан кейин августда тушиб кетди

Биткоин август ойини пасайиш билан бошлади. Бу ҳақда «Дарё»га криптобиржа маълумотларидан маълум бўлди.

Дунёдаги энг йирик криптовалюта шанба, 30 июль куни бир ярим ойлик энг юқори даражага чиққан эди — 24 593 доллар. Бу 13 июндан бери энг яхши кўрсаткич. 

Душанба, 1 август куни биткоин 23 263 долларгача арзонлашди. Криптовалютанинг июль ойида 27 фоизга ошгани октябрдан бери энг яхши ой бўлганини англатади. 

Таҳлилчилар август ойида биткоин нархи ўзгарувчан ҳолатда бўлишини прогноз қилмоқда. 

Биткоин июнь ва июль ойларида АҚШда асосий ставканинг ошиши, инфляция ва криптовалюталар билан боғлиқ муаммолар туфайли 20 минг доллардан пастга тушиб кетган эди.

CoinDesk порталидаги маълумотларга кўра, Тошкент вақти билан соат 11:00 га келиб виртуал валютанинг қиймати 23 336 доллар бўлиб турибди.

Биткоиннинг бозор қиймати 444 млрд доллар бўлиб турибди. 2021 йил ноябрь ойида криптовалюта нархи 68 минг долларгача кўтарилган эди.