Bitkoin narxi iyulda muvaffaqiyatli ko‘tarilgandan keyin avgustda tushib ketdi

Bitkoin avgust oyini pasayish bilan boshladi. Bu haqda “Daryo”ga kriptobirja ma’lumotlaridan ma’lum bo‘ldi.

Dunyodagi eng yirik kriptovalyuta shanba, 30-iyul kuni bir yarim oylik eng yuqori darajaga chiqqan edi — 24 593 dollar. Bu 13-iyundan beri eng yaxshi ko‘rsatkich. 

Dushanba, 1-avgust kuni bitkoin 23 263 dollargacha arzonlashdi. Kriptovalyutaning iyul oyida 27 foizga oshgani oktabrdan beri eng yaxshi oy bo‘lganini anglatadi. 

Tahlilchilar avgust oyida bitkoin narxi o‘zgaruvchan holatda bo‘lishini prognoz qilmoqda. 

Bitkoin iyun va iyul oylarida AQSHda asosiy stavkaning oshishi, inflyatsiya va kriptovalyutalar bilan bog‘liq muammolar tufayli 20 ming dollardan pastga tushib ketgan edi.

CoinDesk portalidagi ma’lumotlarga ko‘ra, Toshkent vaqti bilan soat 11:00 ga kelib virtual valyutaning qiymati 23 336 dollar bo‘lib turibdi.

Bitkoinning bozor qiymati 444 mlrd dollar bo‘lib turibdi. 2021-yil noyabr oyida kriptovalyuta narxi 68 ming dollargacha ko‘tarilgan edi.