Ўзбекистоннинг Индонезиядаги элчихонаси ходимлари Жакарта шаҳрида Citilink авиакомпаниясининг тижорат директори Ихван Агус билан музокаралар ўтказди, деб хабар бермоқда «Дунё» ахборот агентлиги.
Қайд этилишича, унда компаниянинг чартер ҳаво қатновлари ва Умра сафари бўйича вице-президенти Сузана Валандов, парвозлар тармоғини ривожлантириш бўйича вице-президенти Муҳаммад Юсуф ҳамда халқаро, юк ва чартер қатновлари жадвали бўйича менежер Агунг Сусило ҳам иштирок этган.
ПТ Citilink Indonesia 2001 йилда ташкил этилган Garuda Indonesia миллий авиакомпаниясининг лоукостери (камхарж парвозларни амалга оширувчи авиакомпания) ҳисобланади. Жорий йилнинг июль ойи ҳолатига кўра, компания авиапарки 40 тага яқин самолётдан иборат бўлиб, ҳар куни 200 га яқин парвозларни амалга оширади.
«Citilink авиакомпаниясининг тижорат директори зиёрат туризми доирасида Ўзбекистон орқали парвозларни амалга ошириш имкониятлари истиқболли эканини қайд этган», — дейилади хабарда.
Учрашув якуни бўйича Ўзбекистон томонининг ушбу таклифи ҳамда ҳаво кемалари ижараси имконияти билан боғлиқ масалаларни муҳокама этиш учун уч томонлама қўшма учрашувни ташкил этишга келишиб олинган.
Изоҳ (0)