Ўзбекистонда 2022 йилда 36 мингдан ошиқ одамга ипотека кредитлари ажратилган — Марказий банк

Марказий банк ипотека кредитлари шарҳини тақдим қилди. Унга кўра 2022 йилнинг биринчи ярмида 36,4 минг нафар фуқарога ипотека кредитлари ажратилган.

Ажратилган ипотека кредитлари ўтган йилнинг мос даврига нисбатан 85 фоизга ёки 3 трлн сўмга ошиб, 6,5 трлн сўмни ташкил қилди.

2022 йил 1 июль ҳолатига кўра ипотека кредитлари қолдиғи 40,5 трлн сўмни ташкил этиб, 2021 йилнинг мос даврига нисбатан қарийб 32 фоизга ёки 9,7 трлн сўмга ўсган. 

Молия вазирлиги маблағлари ҳисобидан 30 мингдан кўп фуқарога 5,1 трлн сўм ҳамда банк ўз маблағлари ҳисобидан 6,2 минг нафар фуқарога 1,4 трлн сўм миқдорида ипотека кредитлари ажратилган.

Мазкур даврда ажратилган жами ипотека кредитларининг 5,3 трлн сўми ёки 81 фоизи бирламчи бозордаги уйларга, 1,2 трлн сўми ёки 19 фоизи иккиламчи бозордаги уйлар учун йўналтирилган. 

Ушбу кредитларнинг 41 фоизи ёки қарийб 15 минг нафари аёллар ҳисобига тўғри келади.

Банклар ўз маблағи ҳисобидан ажратган ипотека кредитларининг жами кўрсаткичдаги улуши 2022 йил биринчи ярмида 21 фоизни ташкил этиб, ўтган йилнинг мос даврига нисбатан 178 фоизга ёки 2,8 баробарга ошган.

Ўтган йилнинг биринчи ярмига нисбатан аҳолини уй-жой билан таъминлашнинг бозор тамойилларига асосланган «Янги тартиб» доирасида ажратилган ипотека кредитларининг улуши 48 фоиздан (1,7 трлн сўмдан) 56 фоизга (3,6 трлн сўмга) ошди.

Мавзуга доир:

• Ўзбекистонда ипотекага уй сотиб олиш: шартлар ва талаблар ҳақида асосий маълумотлар ва шахсий тажриба
• 40 миллион сўмгача субсидия: Қандай қилиб кам фоизли ипотека кредитларини олиш мумкин?
• Уй сотиб олиш, уларни қуриш ва реконструкция қилиш учун субсидия тўлаш тартиби ўзгартирилмоқда