Ўзбекистон йил бошидан бери 40 млн доллардан ошиқ кондиционер импорт қилган

Ўзбекистонга 2022 йилнинг январь—июнь ойларида хориждан қиймати 41,5 млн долларга тенг бўлган 184,7 мингта кондиционер импорт қилинган. Бу ҳақда Давлат статистика қўмитаси маълум қилди. 

Кондиционер импорти 2021 йилнинг мос даврига нисбатан солиштирилганда 62 мингтага ошган. Ўзбекистон 27 та давлатдан кондиционер импорт қилган. 

Ўзбекистон 6 ой мобайнида энг кўп кондиционер импорт қилган давлатлар орасида Хитой етакчилик қилмоқда — 174 391 дона.

Иккинчи ўринни Туркия (4 753 та) эгаллаган бўлса, Испания (899 та) учинчи бўлган. 

Ўзбекистонга кондиционер импорт қилган мамлакатлар:

• Литва — 811 дона;
• Таиланд — 772 дона;
• Франция — 515 дона;
• Корея — 498 дона;
• Италия — 458 дона;
• БАА — 388 дона;
• Россия — 265 дона;
• Ҳиндистон — 211 дона;
• Грузия — 208 дона;
• Германия — 124 дона.

Жорий йилнинг январь—май ойларида Ўзбекистон 12 та хорижий давлатга қиймати 13,8 млн долларга тенг бўлган 25 382 та кондиционер экспорт қилган эди. 

Кондиционер экспорти ўтган йилнинг шу даври билан солиштирилганда 2750 тага ошган. 

Ўзбекистон 2022 йилнинг 5 ойида кондиционер экспорт қилган давлатлар орасида Озарбайжон етакчилик қилмоқда — 13 064 та. 

Бу борада кейинги энг яхши кўрсаткичлар қуйидагича:

• Тожикистон — 2940 та;
• Қозоғистон — 2262 та;
• Туркманистон — 2119 та;
• Россия — 2015 та;
• Қирғизистон  — 1675 та.