Яқин йилларгача олий таълим тизимида коррупция кўп учрайдиган бир нечта вазиятлар бўлган. Бу ҳақда Тошкент давлат иқтисодиёт университети ректори Қўнғиротбой Шарипов «Дарё» нашрига берган интервьюсида айтиб ўтди.
Қўнғиротбой Шариповнинг айтишича, айни пайтда коррупцияга йўл очиб берадиган 3 та муаммо ечимини топди.
«Ўқишга кириш жараёнидан бошлаб таҳлил қилинса, асосий коррупция олий таълимга киришда бўларди. Ҳозирги кунда абитуриентларнинг ўзлари танлов ҳуқуқига эга. Улар ҳужжатларни ҳам онлайн топширади. Бундан ташқари, университетга тест топшираётган пайтда ОТМга бормайди. Катта залларда, 300—500 ўринга мўлжалланган, жамоатчилик назорати остида тестларни ўтказади. У ерда ҳам тест жараёнига ташқаридан аралашиш йўқ. Буни аниқ айта оламан. Шу нуқтаи назардан имтиҳонларга кириш коррупциядан тўлиқ тозаланди, деб айта оламан.
Иккинчидан, олдинлари бўш жойлар қўпол қилиб айтганда аукцион бўлиб кетарди. Бўш жой нима дегани: университет сиғими бор, масалан, 2000 нафар талаба қабул қилиниши мумкин. Бизга 1700 та квота берди дейлик. Қолган 300 нафар талабани супер контракт асосида қабул қиламиз. У ҳам пулини келиб университетга тўлаяпти.
Учинчидан, «перевод» масаласи бўларди. Бунда ҳам коррупция кўп эди. Ҳозирда тизим турли «ўйин»лар бўлмаслиги учун Давлат тест маркази ва Вазирлар Маҳкамаси томонидан тартибга солинган. Бизда талабаларнинг ўқишга киришида ҳеч қандай коррупцион ҳолат йўқ», – деди у.
Қўнғиротбой Шариповнинг қўшимча қилишича, бугунги кунда олий таълимда учраши мумкин бўлган коррупция ҳолатлари ўқитувчи ва талаба ўртасида юзага келади.
«Аммо афсуски, кейинги жараёнларда энг катта касалимиз бор. У ҳам бўлса, кўпчилик талабалар олий таълим муассасаларига ўз ихтиёри билан кирмагани учун, кейинчалик уларда ўқиш иштиёқи камайиб боради. Дарсларга келмай қўяди. Ёки контрактни тўлашим керак деб асосий урғуни ишга беради ва контракт тўлаш билан ишим битди деб ўйлайди. Дарсга келмагандан кейин университетнинг ҳам маълум шартлари бажарилиши керак-ку. Масалан, курс иши, малакавий битирув ишлари бор. Умуман, мана шу ерга келган вақтда ожизлик қилади. У тестга кириши, имтиҳон топшириши керак. Мана шу пайтда бошқа йўлларини қидиришни бошлайди. Охирида бир мартада эмас, икки мартада эмас, учинчисида ўқитувчиларимизни айнитиб, баҳосини оладида, ўқитувчиларимиз коррупционэр бўлиб қоляпти.
Ўзим 3 йилдан буён Тошкент иқтисодиёт университетида ишлайман. Бирор марта ўқитувчилар гуруҳдан пул йиғибди, деган гапни эшитмадим. Талабалар билан йилига 2 марта сўровнома қиламиз. Ҳозир ўқитувчилар билан шартномани 1 йиллик қилиб қўйганмиз. Агар ўқитувчининг устидан шикоят тушса, ўқитувчи билан ишлашни келаси йилдан тўхтатамиз», – деди университет ректори.
Аввалроқ сайтимизда Қўнғиротбой Шарипов билан интервьюнинг тўлиқ шакли эълон қилинганди.
Изоҳ (0)