Ташқи ишлар вазири вазифасини бажарувчи Владимир Норов 25 июль куни «Афғонистон: хавфсизлик ва иқтисодий тараққиёт» халқаро конференциясида иштирок этиш учун Ўзбекистонга ташриф билан келган Европа Иттифоқининг Афғонистон бўйича махсус вакили Томас Никлассон билан учрашди. Бу ҳақда ТИВ ахборот хизмати хабар қилди.
Никлассоннинг таъкидлашича, Европа Иттифоқи Шавкат Мирзиёевнинг Марказий Осиёда дўстлик, ишонч ва ўзаро манфаатли ҳамкорликни мустаҳкамлаш бўйича минтақавий сиёсати ва ташаббусини ҳар томонлама қўллаб-қувватлайди.
Учрашувда Ўзбекистон ва Европа Иттифоқи ўртасидаги ҳамкорликнинг долзарб масалалари муҳокама қилинган. Томонлар Ўзбекистон ва Европа Иттифоқи ўртасида кенгайтирилган шериклик ва ҳамкорлик тўғрисидаги битимнинг тасдиқланганини қайд этган ва ушбу муҳим ҳужжатни имкон қадар тезроқ имзолаш зарурлигини таъкидлаган. Афғонистондаги мавжуд вазият юзасидан атрофлича фикр алмашилган.
ЕИ вакилининг келтиришича, Брюссель Ўзбекистоннинг афғон муаммосини ҳал этишдаги сиёсий-дипломатик саъй-ҳаракатлари ва алоҳида ўрнини юқори баҳолайди. Европа Иттифоқининг минтақавий кун тартиби бўйича Тошкент билан мунтазам мулоқотни давом эттиришдан манфаатдорлиги маълум қилинган.
Эслатиб ўтамиз, 24 июль куни Афғонистон муваққат ҳукумати ташқи ишлар вазири вазифасини бажарувчи Амир Хон Муттақий бошчилигидаги делегация ташриф буюрди. Делегация 2022 йил 25—26 июль кунлари Тошкент шаҳрида бўлиб ўтадиган «Афғонистон: хавфсизлик ва иқтисодий тараққиёт» халқаро конференцияда иштирок этиши назарда тутилган.
Изоҳ (0)