Марказий банк Ўзбекистондаги нархлар билан боғлиқ вазиятни тушунтирди

Ўзбекистонда июнь ойига келиб йиллик инфляция 12,2 фоизга етди. Марказий банк бу вазиятни тушунтирди. 

Июнь ойида йиллик инфляция суръати 12,2 фоизни ташкил этди. Ушбу ўсиш асосан глобал инфляцион жараёнлар шароитида импорт инфляцияси, товарларни етказиб бериш ва логистикасида юзага келаётган муаммолар билан изоҳланади. 

Бундан ташқари ғалла етиштириш ва сотиш нархларининг эркинлаштирилиши каби омиллар ҳам юқори инфляцияга сабаб бўлмоқда.

Йиллик инфляция таркибида озиқ-овқат маҳсулотлари нархлари 16,5 фоизга ошган бўлса, ноозиқ-овқат товарлари ва хизматлар мос равишда 10,7 ва 6,8 фоизга қимматлашди.

Бу ўз навбатида, умумий инфляциянинг пасайиб боришида озиқ-овқат нархларининг барқарорлашувига асосий эътиборни қаратишни тақозо этади.

Июнь ойида ўтказилган сўровлар натижаларига кўра, келгуси 12 ой учун нархлар ўсиши бўйича аҳоли вакилларининг инфляцион кутилмалари май ойидаги кескин ўсишдан кейин (17,6 фоиз) пасаювчи ҳолатни кўрсатди. 

Ўзбекистон аҳолиси инфляцияни келгуси 12 ойда 16,4 фоиз атрофида бўлишини кутаётган бўлса, тадбиркорликда бу кўрсаткич 15,7 фоизгача пасайди (май ойида 17,3 фоиз).