Марказий банк ва MasterCard Europe ўртасида ўзаро ҳамкорлик тўғрисида англашув меморандуми имзоланди. Бу ҳақда Марказий банк матбуот котиби маълум қилди.
Меморандум ташкилотларнинг фаолиятлари доирасидаги ўзаро муносабатларини кенгайтиришга қаратилган.
Мазкур ҳужжат қуйидаги ўзгаришларга хизмат қилади:
- қўшма техник маслаҳатлар;
- тренинглар;
- семинарлар ўтказиш;
- ходимларнинг билим ва кўникмаларини ошириш.
MasterCard дунёдаги йирик тўлов тизимларидан бири ҳисобланади. Ушбу халқаро карта деярли барча мамлакатларда қабул қилинади.
MasterCard’нинг қандай турлари бор?
Ўзбекистонда MasterCard карталарининг Virtual, Standard, Gold ва Premium каби турлари мавжуд.
MasterCard Virtual электрон равишда очилади, шу сабабли уни терминалларда ёки банкоматларда ишлатиш мумкин эмас. Асосий афзаллик — расмийлаштиришнинг осонлиги ва паст тарифлардир.
Энг кенг тарқалган тур — MasterCard Standard. Унда хизмат кўрсатиш паст нархда ва кенг функционалликда бўлади.
Карта ёрдамида меҳмонхона хонасини брон қилиш, авиачипталарни харид қилиш кабиларни амалга ошириш мумкин.
Карта қандай очилади?
Деярли барча банкларда картани расмийлаштириш учун фақат паспорт ва пул талаб қилинади.
Аксарият ҳолларда банк офисига икки марта бориш талаб этилади: биринчисида — ариза ёзиб, ҳужжатлар тақдим этилади, иккинчиси — тайёр картани олиш учун.
Бундан ташқари, ҳозирда MasterCard карталарга онлайн буюртма бериш имконияти ҳам мавжуд. Бунда MasterCard очиш учун танланган банкнинг расмий сайтига кириш керак.
Банкларнинг тартиб-қоидаларидан келиб чиқиб, тайёр картани банк офисидан олиб кетиш ёки етказиб бериш хизматидан фойдаланиш мумкин.
Карта 2-3 йилга амал қилади. Ушбу даврдан сўнг, банк картани бепул қайта чиқаради.
Изоҳ (0)