Айни пайтда Uzcard билан Humo карталарини унификация қилиш ишлари давом этмоқда. Бу ҳақда бугун, 21 июль куни ўтказилган матбуот анжуманида Марказий банк раиси Мамаризо Нурмуродов маълум қилди, дея хабар бермоқда «Дарё» мухбири.

Ўзбекистонда 2021 йил охиригача барча терминаллар Uzcard ва Humo карталарини бирдек қабул қилиши билдирилганди. Аммо бу режа ҳозир ҳам амалга ошмаган. Мамаризо Нурмуродов жараённинг кечикиш сабабини айтди.

«Uzcard билан Humo бўйича ишлар бирмунча қийин кетяпти. Буни тан олиш керак. Ҳозир биринчи навбатда эксперимент сифатида терминалларни унификация қилиш бўйича ишлаяпмиз. Кейинги босқичда банкоматлар масаласи турибди.

Қийин деганимнинг сабаби Uzcard хусусий компания бўлгани билан боғлиқ. Компания қўядиган маълум бир шартлар бизнинг Humo‘га тўғри келмайди. Humo‘ни ҳам тўғри тушуниш керак. Агар ким ундан кўпроқ молиявий операциялар қилса, жуда кўп ижтимоий аҳамиятга эга операциялари бор. Яъни фоиз олмайдиган операциялари бор. Шулар бўйича иш кетяпти. Бу тўхтаб қолгани йўқ», – деди Марказий банк раиси

Аввалроқ Мамаризо Нурмуродов 200 000 сўмлик муддатидан олдин чиқарилиши сабабларини маълум қилганди.