Ижтимоий тармоқларда аёл сосиска сотиб олгани, уни қайнатаётган пайтда ёрилиб кетиб, ичидан қурт чиққани айтилган видео тарқалди. Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков ҳолатга изоҳ берди.

Бир жиҳатга эътибор қаратмоқчиман. Бу ҳолат худди катта денгизга бир қошиқ туз ташлагандай гап. Биз айнан шу маълумотни кўриб, фақат бир нарсани англаб етдик. ‘Нур’ деган қадоқда сосиска маҳсулоти бўлган. Лекин у ҳақиқатан ўша қадоқ сосискасими ёки йўқ — буни билмаймиз.

Негаки биз уни қидириб топишимиз учун ўша маҳсулотни жойлаштираётган шахс ҳеч бўлмаганда ўз исм-шарифини, телефон рақамини, қаердан, қачон ва кимдан бу маҳсулотни харид қилганини айтса, бизга (Санитария-эпидемиологик осойишталик ва жамоат саломатлиги хизмати — таҳр.), Истеъмолчилар ҳуқуқларини ҳимоя қилиш агентлигига бу маҳсулотни қидириб топиш, уни сотаётганларга қарши чора кўриш, агар шу каби маҳсулотлар ишлаб чиқарилаётган бўлса, уларга ўз муносабатимизни билдиришимиз мумкин, — дейди мутахассис.

Отабеков одамларни хавотирга қўйиш асосий мақсад бўлиб қолмаслиги кераклиги, бу каби маълумотларни ижтимоий тармоқларга жойлаштирадиган одам аниқ манзилини айтса, масъуллар бутун бошли республикадан қидириб юргандан кўра, тезкорлик билан топиб, муносабатини билдиришини қайд этди.