Банкларда 2 ва ундан ортиқ йилдан бери тўланмай келаётган аҳоли қарзларидан кечиб юбориш керак. Бу ҳақда иқтисодчи Абдулла Абдуқодиров «Дарё» нашрига берган интервьюсида айтиб ўтди.
Иқтисодчининг фикрича, мамлакат иқтисодий ривожланиши учун бир неча вазифаларни белгилаб олиш зарур.
«Биринчидан, ёқилғи-энергетика ресурсларига бўлган нарх-навонинг шаклланиши устидан давлат назоратини кучайтириш керак.
Иккинчидан, бюджетдан аҳолининг энг ёрдамга муҳтож қатламларига тўғридан-тўғри тўловларни амалга ошириш лозим. Ҳозир аҳолига ёрдам берилмаса, бўлмайди.
Учинчидан, банкларда 2 ва ундан ортиқ вақтдан бери тўланмай келинган қарзлар бўйича резервлар ташкил қилиб, аҳолининг ўша қарзларидан кечиб юбориш керак. У пуллар барибир келмайди. У қарзлардан умид йўқ.
Энг муҳими кичик ва ўрта бизнесни ривожлантириш бўйича жиддий ҳолда бир қатор ҳукумат тадбирларини ишлаб чиқиш керак. Ҳалиги, товуқчилик, паррандачилик деб, алоҳида-алоҳида секторлар бўйича эмас, умумий битта йўналиш бўйича ҳамма тадбиркорларни қўллаб-қувватлайдиган тадбирларни ишлаб чиқиш зарур. Буларнинг орасида энг муҳими – солиқ ставкаларини қайта кўриб чиқиш. Яъни биринчи навбатда умумий солиққа ўтиш даражасини 1 млрд сўмдан 5 млрд сўмга кўпайтириш керак», – деди мутахассис.
Абдулла Абдуқодировнинг қўшимча қилишича, умуммиллат фонди ташкил этиш ҳам иқтисодий ўсиш учун катта ёрдам беради.
«Умуммиллат доирасида катта бир инвестицион фонд ташкил қилиш лозим. Масалан, унинг ҳисобида 100 трлн сўм маблағ бўлсин. Ана шу фонддан банкларга жуда паст фоизларда ва узоқ муддатга кредитлар ажратиш керак. Масалан, сўмда 5-6 фоизга ва узоқ муддатга, айтайлик 10-15 йилга бериш мумкин. Кейин Марказий банк ўзининг сиёсатини ўзгартириши керак. Турли депозитлар, облигациялар сотиб, банкларнинг пулини тортиб олаётган ҳолатларини йўқотиши лозим. Марказий банк нақд пулни чеклаши керак эмас. Аммо у нақд пулни чеклаб ётибди. Нарх-наво ошиши ҳаммаси мана шунинг орқасидан бўляпти», – деди иқтисодчи.
Аввалроқ сайтимизда Абдулла Абдуқодиров билан суҳбатнинг тўлиқ матни эълон қилинганди.
Изоҳ (0)