Ўзбекистонда 18 июль куни ҳаво ҳарорати 45 даражагача кўтарилади

Ўзбекистон ҳудудига Туркманистон орқали Эрон ҳудудларидан иссиқ ҳаво кириб келиши давом этади. Ҳарорат фони 38–43 даража атрофида, шимолда, жанубда ва чўл ҳудудларда баъзи жойларда 44–45 даражагача бўлган қуруқ ва иссиқ об-ҳаво бўлиши кутилмоқда.

Чўл ҳудудларда баъзи жойларда шамол 15–20 метр/секундгача кучайиши, айрим жойларда чанг-тўзонлар кузатилиши мумкин. Тоғларда кутилаётган юқори ҳарорат фони ҳисобига Қирғизистон ҳудудидан Фарғона вилояти тоғолди ва тоғли ҳудудлари бўйича: Сўх, Фарғона туманларида ва Сўх, Шоҳимардон, Исфайрамсой дарёларида гляциал (муз) сел-сув тошқин ҳодисалари юзага келиши мумкин.

Тошкентда ҳаво қуёшли бўлади. Максимал ҳарорати 39–41 даражага етади.

Тоғли ҳудудларда ёғингарчилик кутилмайди. Шамол 7–12 метр/секунд тезликда эсади, баъзи жойларда шамол 15–20 метр/секунд кучайиши, айрим жойларда чанг-тўзонлари кузатилиши мумкин. Ҳаво ҳарорати 30–35 даража бўлади.