Инсон ҳаётида «илк» сўзи билан боғлиқ хотиралар ҳеч қачон унутилмайди. Илк муҳаббат, илк устоз, илк муваффақият ёки илк даромад... Хўш, машҳур ижодкорлар илк даромадларини қандай хотирлайди?
Асал Шодиева
— Илк гонораримни Равил Ботировнинг «Жаннат қайдадир» фильмидаги ролим учун олганман. Давлат буюртмаси асосида олинган фильмдаги ролим учун 400 минг сўм гонорар беришган. Фильмда кичик рол ижро этишдан ташқари, саундректини ҳам дуэт тарзида ижро этгандим. 2008 йилда ёш қиз учун бу кам гонорар эмасди, — дейди актриса Асал Шодиева.
Йигитали Мамажонов
— Биринчи гонорар билан боғлиқ хотиралар инсонни қувонтириши керак. Аммо менда ундай эмас. 2011 йили давлат фильмида суратга тушганман. Бу фильмдаги илк катта ролим эди. Давлат фильми, шарт-шароитлар бошқача бўлади, деган умид бўлган. Адашмасам, қиш ойи эди. Совуқда эшакдек (шундай дейишга мажбурман) ишлаб, ҳамма иш битганидан сўнг қўлимга 870 минг сўм гонорар беришган, — дейди актёр Йигитали Мамажонов.
Нигора
— Санъатдаги илк даромадимни продюсерлик маркази билан ҳамкорлик қилишни бошлагандан кейин олганман. Аммо ундан аввал тўрт йил давомида ишлаганман. Биринчи даромадимни 14 ёшимда уч ойлик таътил вақтида олганман. Ўшанда маҳалламиздаги боғчада энагалик қилганим учун пул беришган. Пулни раҳматли дадамга олиб келганимда, шу пулга бозорлик қилиб ўз қўллари билан ош қилиб берганди, — дейди хонанда Нигора.
Ситора Алимжонова
— Илк гонораримни Фарғона санъат коллежининг балет йўналишида ўқиб юрган кезларимда олганман. Ўшанда гуруҳимиздаги барча қизларни давлат тадбирида рақс тушиш учун олиб боришганди. Кейин бизни олиб борганлар гонорар ҳаққи сифатида икки минг сўмдан пул беришган. Пул миқдори унчалик кўп бўлмаса ҳам бизни роса қувонтирганди, — дейди Ситора Алимжонова.
Шаҳзода Муҳаммедова
— Илк даромадимни 14 ёшда қўлга киритганман. Ўшанда ён қўшнимизга чизган эскизим ёқиб, «Шу асосида кўйлак тикиб бероласанми?», деган. Қўрқмасдан ҳа деганман ва кўйлакни тикканман. Аниқ эсимда, кўйлак учун 70 минг сўм иш ҳаққи олгандим, — дейди актриса Шаҳзода Муҳаммедова.
Зилола Ғуломова
— Отам вафот этганидан кейин онам 4 та болани боқишга қийналиб қолган. Буни билдирмасликка ҳаракат қилса-да. Унинг қийналаётганини билардим. Шу боис катта опам билан ишлашга қарор қилганман. Мен 7-синф ўқувчисиман. Опам эса мактабни тамомлаганди. Амакимнинг кафесига ишга кириб, ошпазларга қарашардик. Мен хотдог ва музқаймоқ сотишга уста эдим. Ҳар куни ярим кечаси пуллар тақсимланарди. Амаким ҳамма қатори бизга ҳам 3 минг сўмдан пул берарди. 2002 йил учун бу пулнинг қадри анча баланд эди. Опам билан илк даромадимизни олиб борганимизда, онам йиғлаб дуо қилганди. Мен устомон қиз бўлганим учун чой-чақа пуллар ҳам ташлаб кетишарди. Аниқ эсимда, бир марта 11 минг сўм ишлаб топганман. Ўша пайтда мендан бахтли одам йўқ эди, — дейди актриса Зилола Ғуломова.
Шаҳло Зоирова
— Илк даромадимни 5-синфда ишлаб топганман. Ўшанда Сергелидаги автокорхона ҳайдовчилари учун совуқ чой сотиб пул қилганман. У пайтларда тайёр сувлар кам бўлгани учун уйда тайёрланган компот ва совуқ чойларга талаб юқори бўлган. Ўшанда ишлаб топган пулларимга энг чиройли ўқув қуролларини сотиб олгандим, — дейди Шаҳло Зоирова.
Алишер Узоқов
— Илк ролимни 1984 йил чақалоқлик пайтимда ижро этганман. Унга қанча гонорар беришганини эслай олмайман (кулиб). Ундан кейин «Остона» сериалида суратга тушганман. Гонорар беришган, аммо кўп эмас. Энг кўп ва эсда қоларли гонорарни «Застава» сериалида олганман. Олти ой давом этган съёмканинг ҳар бир куни учун 200 АҚШ долларидан беришган, — дейди актёр Алишер Узоқов.
Умид Искандаров
— Илк гонораримни «Қасд» фильмидаги иштироким учун олганман. Бу илк ролим бўлган бўлса-да, икки минг АҚШ доллари гонорар тўлашган. Чунки мен рол сўраб бормаганман. Режиссёрнинг ўзи санъат институтига келиб, ролга мос йигит-қизларни танлаб олганди, — дейди актёр Умид Искандаров.
Муқаддас Саъдуллаева
— Илк гонораримни 15-16 ёшларимда қозоғистонлик ижодкорларнинг клипида суратга тушиб, олгандим. Ўшанда берган пулларининг бир тийинига ҳам хиёнат қилмай, онамга олиб борганман. Онам роса хурсанд бўлганди, — дейди актриса Муқаддас Саъдуллаева.
Мавзуга доир:
- Ўзбекистондаги энг «қиммат» актёрлар: уларнинг бир кунлик гонорари қанча?
- Уларнинг кунлик гонорарини бошқалар бир ойда топади: Ўзбек киносининг «энг қиммат» актрисалари рейтинги (фото)
- «Кунига 750 доллар топардим». 20 дан ортиқ Голливуд фильмида суратга тушган Алихан Green Card’и бўла туриб, Америкага кетмаётгани сабаби ҳақида (видео)
- Том Ҳолланд, Эндрю Гарфилд ёки Тоби Магуайр: Қаҳрамони учун энг кўп ҳақ тўланган «Ўргимчак одам» ким?
- «Унчалик бой эмасман». 900 миллион доллар даромад келтирган «Калмар ўйини» режиссёрига қанча пул тўланган?
Изоҳ (0)