James Webb космик телескопи узоқ коинотнинг энг теран, энг аниқ ва батафсил тасвирини олди. Бу ҳақда АҚШ Миллий аэронавтика ва космик маъмурияти (NASA) сайтида маълум қилинди. Бу, шунингдек, телескоп томонидан олинган дастлабки тўлиқ рангли фотосуратлардан биридир.
Сурат телескопнинг яқин инфрақизил камераси NIRCam ёрдамида олинган. Унда NASA томонидан тасвирланган SMACS 0723 галактика кластери акс этган бўлиб, у «осмоннинг қум заррасига тенг майдонини эгаллайди». Суратни олишга бир неча ҳафта вақт кетган.
NASA аниқлик киритишича, SMACS 0723 телескоп учун гравитацион линзадир ва ўзининг орқасидаги узоқроқ галактикаларни катталаштириб кўрсатади. NIRCam ушбу галактикаларнинг илгари кўрилмаган «майда тузилмаларини» суратга олишга муваффақ бўлди.
James Webb — инсоният томонидан коинотга учирилган энг катта ва энг кучли телескопдир, дейилади Европа космик агентлиги (EСА) маълумотларида. Қурилма NASA, EСА ва Канада космик агентлигининг (CСА) биргаликдаги ишланмасидир. Унинг ёрдами билан олимлар космоснинг ривожланиш босқичларини — қуёш тизими ва бошқа галактикаларни ўрганиши мумкин бўлмоқда.
Телескоп Ерга биринчи суратни 2 февраль куни, Ердан 1,5 миллион километр узоқликдан туриб юборган. Унда Қуёшдан тахминан 260 ёруғлик йили узоқликда жойлашган ва унга ўхшаш HD 84406 юлдузининг 18 та тасвири кўрсатилган. Шу билан бирга, олимларнинг бу юлдузга илмий қизиқишлари бўлмаган — у ёрқинлиги ва осон идентификацияси туфайли танланган.
Тасвирлар ёруғлик NIRCam'нинг яқин инфрақизил камерасига кириб боришини ва барча қурилмалар тўғри ишлашини исботлади.
Изоҳ (0)