«Барселона» бразилиялик футболчи учун 72 миллион евро таклиф қилди

«Лидс» вингери Рафинья Диас «Барселона»га ўтади.

Журналист Фабрицио Романонинг ёзишича, каталонияликлар футболчи учун кафолатланган 72 миллион евро таклиф қилган. «Лидс» ушбу таклиф расмий бўлганидан сўнг уни қабул қилишга тайёр.

Бразилияликнинг ўзи ҳам «Лидс»дан «Барселона»нинг таклифини қабул қилишни сўраган. «Кўк-анорранглилар» либосида ҳаракат қилиш 25 ёшли футболчининг орзуси ҳисобланади.

Goal нашрининг хабарига кўра, «Барселона» ва «Лидс» оғзаки келишувга эришган. «Челси» Рафинья учун курашдан чиққан. Яқин кунларда ушбу трансфер эълон қилинади.

Инглиз клуби каталонияликлар пулни бўлиб тўлашига рози бўлган. Ҳозирда «Барселона» 72 миллионни бирданига тўлайдиган ҳолатда эмас. Жамоалар трансфернинг сўнгги тафсилотларини муҳокама қилмоқда.

Рафинья Диас 2021/22 йилги мавсум АПЛда 35 та ўйинда майдонга тушиб, 11 та гол ва 3 та голли узатмага муаллифлик қилган.