Ижтимоий тармоқларда Самарқанд ва Паст Дарғом туманларини бир-бирига боғловчи дарё ўзанида ёнғин содир бўлгани тўғрисида хабар тарқалди. Вилоят Экология ва атроф-муҳитни муҳофаза қилиш бошқармаси ҳолат юзасидан маълумот берди.
Самарқанд тумани Экология ва атроф-муҳитни муҳофаза қилиш бўлими давлат инспекторлари томонидан олиб борилган ўрганиш ишларида маълум бўлишича, 8 июль куни тушдан сўнг Қорадарёнинг Самарқанд тумани «Захлик» маҳалласи ҳудудидан оқиб ўтувчи қирғоқ минтақасида ёввойи ҳолда ўсадиган юлғунзор номаълум шахслар томонидан ёқиб юборилган.
Ҳолат туман ФВБ ёнғин-қутқарувчилари томонидан тезкор тартибда бартараф этилган. Аниқланишича, ёнғин натижасида 4 гектар ер майдонидаги бута ва юлғунлар ёнган.
Қайд этилишича, ҳозирда Самарқанд тумани Экология ва атроф-муҳитни муҳофаза қилиш бўлими ва тегишли мутасадди ташкилотлар томонидан ҳолат юзасидан қонунда белгиланган тартибда суриштирув ва ўрганиш ишлари олиб борилмоқда.
Изоҳ (0)