Бирлашган Миллатлар Ташкилоти Тараққиёт дастури ҳисоботига кўра, Украинадаги уруш туфайли юзага келган озиқ-овқат ва энергия нархларининг кўтарилиши натижасида дунё бўйлаб яна 71 миллион киши қашшоқликни бошдан кечирмоқда.
Инфляциядан энг кўп жабр кўрган 20 давлат орасида Ўзбекистон ҳам бор. Бундан ташқари, Гаити, Аргентина, Миср, Ироқ, Туркия, Филиппин, Руанда, Судан, Гана, Кения ва Шри-Ланка ҳам ушбу рўйхатга киритилган.
Урушдан кейинги дастлабки уч ой ичида 51,6 миллион кўпроқ одам қашшоқликка тушиб, кунига 1,90 доллар ёки ундан кам даромад билан кун кечирган.
Яна 20 миллион киши кунига 3,20 доллар даромадга кун кечираётгани қайд этилди.
Ривожланаётган мамлакатларда оилалар ўз даромадларининг 42 фоизини озиқ-овқатга сарфлайди, аммо Ғарб давлатлари Россияга санкциялар киритгач, ёқилғи, буғдой, шакар ва ёғ каби асосий озиқ-овқат маҳсулотлари нархи кўтарилди.
Украинанинг тўсиб қўйилган портлари ва паст даромадли мамлакатларга дон экспорт қила олмаслиги нархларни янада ошириб, ўн миллионлаб одамларни қашшоқликка олиб келди.
Маълумотларга кўра, қашшоқ ёки қашшоқликка мойил бўлган одамларнинг умумий сони 5 миллиарддан ортиқ ёки дунё аҳолисининг 70 фоиздан сал камроғини ташкил қилади.
Инқирознинг энг кескин таъсирига Марказий Осиёда Арманистон ва Ўзбекистон, Африкада Буркина-Фасо, Гана, Кения, Руанда ва Судан, Лотин Америкасида Гаити, Жанубий Осиёда Покистон ва Шри-Ланка киради.
Бирлашган Миллатлар Ташкилоти Тараққиёт дастури энергия субсидияларига миллиардлаб маблағ сарфлаш ўрнига ҳукуматларга харажатларни мақсадли пул ўтказмалари орқали энг кўп зарар кўрган одамларга етказишни тавсия қилади.
Бу эса яна 52,6 миллион кишининг кунига 5,50 доллар даромадга кун кечириш даражасига тушиб қолишининг олдини олади.
Изоҳ (0)