Қурбон ҳайити — муборак айём! Бу чинакам бирлик, ҳамжиҳатлик ва бағрикенглик куни, чексиз меҳр ҳамда саховат тимсолидир.
Enter Engineering ижтимоий масъулиятли компания сифатида ушбу ёрқин байрам арафасида муҳтож инсонларга ёрдам беришга қаратилган акцияларни уюштириши анъанага айланган. ERIELL Group ва Humo Arena кўп функцияли муз мажмуаси билан ҳамкорликда навбатдаги хайрия тадбири ташкил этилди.
Жорий йилнинг 6 июль куни бўлиб ўтган акция доирасида 38 хил касалликларга чалинган, имконияти чекланган фарзандлари бўлган 400 га яқин оилаларга ёрдам кўрсатилди. Уларнинг барчаси 19 йилдан буён шу каби оилаларни ижтимоий қўллаб-қувватлаб келаётган APLA нодавлат нотижорат ташкилоти ғамхўрлиги рўйхатида туришади.
Шу куни болалар ота-оналари ҳамроҳлигида махсус қулай автобусларда Humo Arena саройига олиб келинди. Ташкилотчилар меҳмонлар мажмуага етиб келишлари биланоқ байрам шукуҳини ҳис этишлари учун астойдил ҳаракат қилишди. Эрта тонгдан ва кун давомида бу ерда меҳрли ва меҳмондўст муҳит ҳукм сурди, шунингдек, паловнинг ёқимли иси димоғни қитиқларди. Айнан ушбу таом меҳмонларимиз учун Humo Arena маъмурияти томонидан махсус тайёрланган эди.
Меҳмонлар келиши билан мажмуа бўйлаб экскурсия ташкил этилди. Болалар мутахассислар ҳамроҳлигида музга чиқиб, бир неча дақиқа бўлсада, ўзларини ҳақиқий хоккей ўйинчиларидек ҳис қилиш — махсус ўйин таёғини қўлга олиб, дарвозага шайба уриш имконига эга бўлишди.
Бундан ташқари, фигурали учиш ўйинчиларининг кўргазмали чиқишлари, турли элементларнинг ажойиб ижроси йиғилганларни беҳад хурсанд қилди ва уларга улкан завқ бағишлади.
«Ушбу байрам ташкил этилганидан бениҳоя хурсандмиз. Эътибор ва ғамхўрлик барчамиз учун жуда муҳим, имконияти чекланганлар учун эса бу икки баравар зарур. Ушбу акцияни ўтказишга бел боғлаган барча ташкилотчиларга — Enter Engineering, ERIELL Group компанияларига ва Humo Arena мажмуасига улкан миннатдорлигимизни билдирамиз. Инсонга юқоридан бериладиган энг катта афзаллик — бировнинг ҳаётида яхши ўзгаришларга сабабчи бўлиш», — дейди APLA АЖ раҳбари Олеся Усмонова.
Акциянинг 116 нафар иштирокчисига турли озиқ-овқат тўпламлари топширилди. Тадбирга кела олмаганлар учун (тахминан 270 нафар кишига) ташкилотчилар томонидан озиқ-овқатлар пакетлари манзилма-манзил етказиб берилди.
Акция ҳақида видеорепортажимиз орқали янада батафсилроқ маълумотларга эга бўлишингиз мумкин.
Маълумот шериклик ҳуқуқи асосида тайёрланди.
Изоҳ (0)