«Оломонни тарқатиш мақсадида қизил рангли бўёқ сувга аралаштириб сепилган» — Миллий гвардия

1 июль куни Нукусда содир бўлган тартибсизликни тинчитиш ва оломонни тарқатиш мақсадида намойишчиларга сувга аралаштирилган қизил бўёқ сепилган. Бу ҳақда Қорақалпоғистон Республикаси бўйича Миллий гвардия бошқарма бошлиғининг ўринбосари Абдижан Абдувалиев маълум қилди, деб хабар берди «Дарё» мухбири.

Абдижан Абдувалиевнинг айтишича, қизил ранг тартибсизликларда иштирок этганларни ажратиб олиш мақсадида қўлланилган.

«Мана бу қизил бўёқ оломонни тарқатиш мақсадида сепилади. Бундан мақсад тартибсизликларда иштирок этганларни ажратиб олиш. Бунинг инсонларга нисбатан ҳеч қандай зарар томони йўқ. Қизил ранг тез ажратиб олиш учун қўлланилади, шунингдек, у кўзга тез ташланади», — дейди у.

Оммавий тартибсизликлар вақтида намойишчиларни тарқатиш учун қизил рангли махсус суюқлик сепилиши бошқа давлатларда ҳам учраб туради. Хусусан, 2020 йилнинг сентябрида Беларусда бўлиб ўтган оммавий норозилик ҳаракати иштирокчиларига қарата водомётлардан ранг қўшилган сув сепилган.

Нукус воқеалари хронологияси

1 июль куни соат тахминан 15:00 лардан бошлаб Нукусда айрим фуқаролар амалга оширилаётган конституциявий ислоҳотларни нотўғри талқин қилиб, кутилмаганда кўча юришларини ташкил қилди. Нукуснинг Марказий деҳқон бозорида тўпланиб, намойишлар уюштирилди. Жамоат тартибининг бузилишининг олдини олиш ҳамда фуқаролар томонидан турли тартиббузарликларни содир этишларига йўл қўймаслик мақсадида деҳқон бозори ҳудудига ҳуқуқни муҳофаза қилиш органларининг куч ва воситалари жалб этилди.

Шавкат Мирзиёев 2 июль куни Нукусга борди ва Жўқорғи Кенгес депутатлари, Қорақалпоғистон фахрийлари ва фаоллари билан учрашув ўтказди. Учрашувда президент Конституциянинг Қорақалпоғистонга тегишли моддаларини амалдаги таҳрирда ўзгаришсиз қолдириш зарурлигини айтди. Қорақалпоғистон халқига мурожаат қилиб, Конституциявий қонун лойиҳаси референдумдан кейингина қонуний тусга киришини айтиб, фуқароларнинг хоҳиш-иродаси, таклиф ва фикрларидан келиб чиққан ҳолда, ушбу лойиҳа ўзгариб, такомилига етказилишини таъкидлади.

«Нега менга телефон қилиб айтмадинг одамлар норози бўлаётганини? Менга ҳам Қорақалпоғистоннинг эртаси, тинчлиги керак», — деган Шавкат Мирзиёев.

Давлат раҳбари ҳозирги вазиятда барча фуқароларни ҳамжиҳатлик ва бирдамликка, оқилона иш кўришга, турли ғаразли чақириқ ва ҳаракатларга берилмасликка даъват этди.

Шундан сўнг  президент фармони билан Қорақалпоғистонда 3 июлдан 2 августгача фавқулодда ҳолат жорий этилиб, бир қатор чора ва вақтинчалик чекловлар ўрнатилди. Фавқулодда ҳолат амал қилиши даврида Ўзбекистон Мудофаа вазирлиги кучлари ва воситалари қўшимча равишда жалб этилиши белгиланди.

3 июль куни Шавкат Мирзиёев яна Нукусга бориб, видеоселектор ўтказди. Туман ҳокимлари ва ҳуқуқни муҳофаза қилувчи органлар раҳбарлари фуқароларнинг хавфсизлигини таъминлаш, қонунийлик ва ҳуқуқ-тартиботни мустаҳкамлаш бўйича кўрилаётган чора-тадбирлар юзасидан ахборот берган. Давлат раҳбарининг мурожаатидан кейин вазият барқарорлашгани, ҳаёт ўз маромига қайтаётгани маълум қилинди.

4 июль куни Ўзбекистон Бош прокуратураси «Мени Қорақалпоққа бош қилиб, изимдан юришингизни сўрайман», дея халқни митингга чорлаган блогер Конституциявий тузумга тажовузда айбланаётганини маълум қилди.

Қорақалпоғистон Республикаси ҳудуди коменданти, генерал майор Рустам Жўраев Қорақалпоғистондаги тартибсизликларда 14 нафар фуқаро тартибсизликлар содир бўлган жойда турли даражадаги жароҳатлардан вафот этгани, улардан 13 нафари алкоголь ва гиёҳванд моддалар таъсирида бўлганини маълум қилди. Шунингдек, хизмат бурчини бажарган ҳуқуқ-тартибот органлари ходимларидан ҳам 4 нафари ҳалок бўлган.