Тошкент шаҳар адлия бошқармаси томонидан 83 та ходимга 656 млн сўм ҳомиладорлик ва туғиш нафақалари ундириб берилди

Тошкент шаҳар адлия бошқармаси томонидан 656 млн 377 минг 909 сўм миқдоридаги нафақалар ундирилди ҳамда 28 та мансабдор шахсларга нисбатан маъмурий таклифлар киритилди. Бу ҳақда Тошкент шаҳар адлия бошқармаси ахборот хизмати «Дарё»га хабар берди.

Тошкент шаҳар бошқармаси томонидан пойтахтдаги барча давлат ташкилотлари ва муассасаларига Меҳнат кодексининг 233-моддаси (Ҳомиладорлик ва туғиш таътиллари) талабларига риоя этиш аҳволи таҳлил қилинган.

Таҳлил натижасига кўра, бир қатор давлат ташкилотлари ва муассасалари томонидан қонун ҳужжатлари талаблари бузилганлиги ҳолатлари аниқланган.

Қонунчиликда белгиланган нормаларга асосланиб, бошқарма томонидан аниқланган қонунбузилиш ҳолатлари юзасидан жами 28 та тақдимнома киритилган. Шунингдек, ҳомиладорлик ва туғиш таътилида бўлган жами 83 та ходимга 656 млн 377 минг 909 сўм ҳомиладорлик ва туғиш нафақалари ундириб берилган.

Ўрганиш натижалари асосида 28 та мансабдор шахсларга нисбатан маъмурий жавобгарлик масаласини кўриб чиқиш ҳақида Тошкент шаҳар бандлик бош бошқармасига 28 та маъмурий таклиф киритилган.