Ўзбекистонда экзотик бамия сотувга чиқди — Қишлоқ хўжалиги вазирлиги

Қишлоқ хўжалиги вазирлиги Ўзбекистонда экзотик бамия етиштирилаётгани ва сотувга чиққани ҳақида маълум қилди.

Қайд этилишича, ноанъанавий сабзавот экинлари селексияси ва уруғчиликни ривожлантириш муҳим масала ҳисобланади.

Янги навларни яратиш ва етиштириш технологияларини ишлаб чиқиш мамлакатимизда соғлом овқатланишнинг асоси бўлган сабзавот экинлари турларини янада кенгайтириш имконини беради.

Бамия мевалари аччиқ қалампирга ўхшаб кетади ва қутисимон пирамида шаклига эга. 

Бамиянинг таъми — бақлажон ёки спаржа ловияси ва қовоқчаникига яқин. Етиштиришда жой танламайди, қурғоқчиликка чидамли.

Бамия мевалари пешоб чиқариш тизими касалликлари ва сурункали диареяда фойдали, – дейди мутахассис Баҳодир Иброҳимов.

Сабзавот табиий шароитда Ҳиндистон, Африка, Шимолий Американинг жанубий туманларида ўсади. 

Бутун дунёда 120 минг гектардан ортиқ майдонда экилади. БМТ Озиқ-овқат ва қишлоқ хўжалиги ташкилоти (FAO) маълумотларига кўра, 2021 йили жаҳон миқёсида 10,1 млн тонна бамия ҳосили олинган.

Ўзбекистонда бамия 2018 йилдан буён етиштириб келинмоқда. Самарқанд, Андижон, Тошкент вилоятларида 200 гектар майдон ушбу экин учун ажратилган. Бир гектардан 13-14 тоннагача ҳосил олинади.

Бугунги кунда Ўзбекистоннинг йирик савдо расталарида ушбу сабзавот сотувга чиққан.

Аввалроқ Ўзбекистон супермаркетларида рамбутан, питахайя ва кумвкат сингари экзотик мевалар сотувга чиққанди.