Буюк Британия ишга қабул қилиш ва бандлик конфедерацияси маълумотларига кўра, ўтган ҳафтада бўш иш ўринлари янги юқори даражага кўтарилди. Бу ҳақда Bloomberg хабар бермоқда.
Иш берувчилар 12 июнгача бўлган ҳафтада 1,69 млн иш ўринларини эълон қилди. Бу 2022 йил учун рекорддир. Деярли барча касблар бўйич ўсиш кузатилмоқда.
Энг кўп бўш иш ўринлари қурилиш секторида бўлмоқда. Буюк Британия бу соҳадаги талабни қондириш учун йилига 50 минг кишини ёллаши керак бўлади. Дурадгорлар ва қурилиш назоратчиларига талаб ортган.
Бу Ўзбекистон учун имкониятми?
Марказий Осиёдаги кўплаб камбағал оилалар учун Россия—Украина урушининг узоқ давом этиши молиявий ҳалокатга олиб келиши мумкин.
Жаҳон банки ҳисоботига кўра, Россияда Марказий Осиёдан келган 8 миллионга яқин муҳожир бўлиб, мамлакат асосий манзил сифатида ўз жилосини йўқота бошлагач, улар бошқа муқобил вариант қидирмоқда.
Июнь ойида Буюк Британиядаги фермер хўжаликлари маҳсулот танлаб олиш ва Brexit билан боғлиқ ишчи кучи танқислигини тўлдириш учун Марказий Осиёдан ишчиларни қабул қилишни бошлади.
Ўзбекистон учун Буюк Британиянинг ишга қабул қилиш дастури манфаатли, чунки ҳукумат аввалроқ Россияга қарамликни камайтириш учун меҳнат миграцияси йўналишларини диверсификация қилишни мақсад қилган, — дейди Eurasianet нашри.
Жаҳон банки маълумотларига кўра, ўтган йили Ўзбекистон пул ўтказмаларининг 56 фоизини Россиядан олган. Бу кўрсаткич 21 фоизга қисқариши кутилмоқда.
Аввалроқ Украинадаги уруш сабаб Ўзбекистон ва бошқа давлатларнинг фуқаролари Россияга ишлаш учун бориши қандай кечаётгани ҳақида хабар берилганди.
Изоҳ (0)