Туркиянинг савдо тақчиллиги рекорд даражага етди
Туркия май ойида рекорд даражадаги савдо тақчиллигига етди, деб хабар беради Bloomberg.
Ўтган йилга нисбатан фарқ 155 фоизга ошди. Январдан майгача бўлган тақчиллик 43,2 миллиард долларни ташкил этди, бу ўтган йилга нисбатан 136 фоизга кўпдир.
Асосий фактлар
- Туркиянинг электр энергиясига сарфлаган харажатлари 124 фоизга ошиб, 6,94 миллиард долларга етди.
- Мамлакат энергиясининг катта қисмини таъминловчи Россия импортнинг асосий манбайи эди.
- Пўлат ва чўян импорти шу даврда 32,9 фоизга ошиб, 3,1 миллиард долларни ташкил этди.
- Автомобиль экспорти 31,4 фоизга ошиб, 2 миллиард долларни ташкил этди.
- Экспорт импортни 64,2 фоизга қоплади. Бир йил аввал 79,8 фоиз эди.
Туркияда нима бўляпти
Сўнгги йиллардаги Туркия иқтисодиёти юзага келган инқироз туфайли қийинчиликларни бошдан кечирмоқда. Масалан, лира кетма-кет 10 йил давомида пасайиб бормоқда.
Яқинда мамлакатда йиллик инфляция 74 фоизга етди. Таққослаш учун, Ўзбекистонда бу кўрсаткич 11-12 фоиз атрофида.
Жорий инфляция иқтисодиёт ва ишлаб чиқаришни рағбатлантириш мақсадида асосий ставкани оширишга қарши чиққан Туркия президенти Ражаб Тоййиб Эрдўғоннинг иқтисодий сиёсати билан боғланмоқда.
Эрдўғон учун вазият Украинадаги уруш туфайли мураккаблашди, бунинг натижасида энергия бўйича жаҳон нархлари кўтарилиб, Туркиянинг ушбу тоифадаги катта харажатларини оширди.
Турмуш нархининг ошиши, 2023 йил июнига режалаштирилган сайловлар олдидан, Эрдўғонни жамоатчилик томонидан қўллаб-қувватлашнинг сусайишига олиб келди.
Бироқ Эрдўғоннинг ҳозирда кучли рақиблари йўқ: олтита мухолифат партиясидан иборат коалиция ягона номзод бўйича келиша олмаяпти, кўплаб мухолифатчи сиёсатчилар судланган ёки жазога тортилган.
