Turkiya may oyida rekord darajadagi savdo taqchilligiga yetdi, deb xabar beradi Bloomberg.
O‘tgan yilga nisbatan farq 155 foizga oshdi. Yanvardan maygacha bo‘lgan taqchillik 43,2 milliard dollarni tashkil etdi, bu o‘tgan yilga nisbatan 136 foizga ko‘pdir.
Asosiy faktlar
- Turkiyaning elektr energiyasiga sarflagan xarajatlari 124 foizga oshib, 6,94 milliard dollarga yetdi.
- Mamlakat energiyasining katta qismini ta’minlovchi Rossiya importning asosiy manbayi edi.
- Po‘lat va cho‘yan importi shu davrda 32,9 foizga oshib, 3,1 milliard dollarni tashkil etdi.
- Avtomobil eksporti 31,4 foizga oshib, 2 milliard dollarni tashkil etdi.
- Eksport importni 64,2 foizga qopladi. Bir yil avval 79,8 foiz edi.
Turkiyada nima bo‘lyapti
So‘nggi yillardagi Turkiya iqtisodiyoti yuzaga kelgan inqiroz tufayli qiyinchiliklarni boshdan kechirmoqda. Masalan, lira ketma-ket 10 yil davomida pasayib bormoqda.
Yaqinda mamlakatda yillik inflyatsiya 74 foizga yetdi. Taqqoslash uchun, O‘zbekistonda bu ko‘rsatkich 11-12 foiz atrofida.
Joriy inflyatsiya iqtisodiyot va ishlab chiqarishni rag‘batlantirish maqsadida asosiy stavkani oshirishga qarshi chiqqan Turkiya prezidenti Rajab Toyyib Erdo‘g‘onning iqtisodiy siyosati bilan bog‘lanmoqda.
Erdo‘g‘on uchun vaziyat Ukrainadagi urush tufayli murakkablashdi, buning natijasida energiya bo‘yicha jahon narxlari ko‘tarilib, Turkiyaning ushbu toifadagi katta xarajatlarini oshirdi.
Turmush narxining oshishi, 2023-yil iyuniga rejalashtirilgan saylovlar oldidan, Erdo‘g‘onni jamoatchilik tomonidan qo‘llab-quvvatlashning susayishiga olib keldi.
Biroq Erdo‘g‘onning hozirda kuchli raqiblari yo‘q: oltita muxolifat partiyasidan iborat koalitsiya yagona nomzod bo‘yicha kelisha olmayapti, ko‘plab muxolifatchi siyosatchilar sudlangan yoki jazoga tortilgan.
Izoh (0)