«Янги Ўзбекистон» боғида президент Шавкат Мирзиёев иштирокида Ёшлар кунига бағишланган тантанали тадбир бўлиб ўтмоқда, деб хабар берди «Дарё» мухбири.
Президентнинг айтишича, сўнгги вақтларда олис ҳудудлардаги мактаблар ўқувчилари ҳам хорижий тиллар бўйича билим беллашувларида яхши натижа кўрсатмоқда.
«Бундай ёшларимиз билан ҳар қанча фахрлансак, уларни рағбатлантириб борсак арзийди. Республика беллашувларида юқори натижаларга эришган ана шундай 70 нафар ўқувчиларимиз ва уларнинг 14 нафар устозлари давлат ҳисобидан Буюк Британияга сафарга юборилади», — дейди давлат раҳбари.
Давлат раҳбарининг таъкидлашича, бугунги кунда мамлакатда ёшлар билан ишлаш бўйича жорий қилинган янги тизим асосида, 8 миллиондан зиёд йигит-қизларни қамраб олган «Ёшлар баланси» шакллантирилди.
«Унга кўра, айни пайтда республикамизда ишсиз йигит-қизлар 1 миллион 200 минг нафарни ташкил этмоқда. Шулардан 850 минг нафари ишлаш истагида бўлган ёшлар ҳисобланади.
Энг муҳими, ёшларнинг қизиқишлари, касб-ҳунарга мойиллиги, маълумоти, ижтимоий аҳволи ва муаммоларидан тўлароқ хабардор бўлиш имконини берадиган тизим яратилди», — дейди президент.
Маълум қилинишича, 2022 йилда 404 минг йигит-қизлар ўрта таълимни, 151 минг нафари профессионал таълим муассасасини битириб, меҳнат бозорига кириб келади.
«Уларнинг бандлигини таъминлаш, энг долзарб вазифа ҳисобланади. Жумладан, бир йил давомида тадбиркорлик дастурларига 4 триллион сўм йўналтириш орқали, 220 минг нафар ёшларнинг бандлиги таъминланади. 130 минг нафар ёшларга касб-ҳунар ва тадбиркорлик кўникмаларига ўқиши учун, 160 миллиард сўм субсидия ажратилади.
110 мингдан зиёд ўғил-қизларимиз эса, давлат корхоналари ва хусусий сектордаги бўш иш ўринларига жойлаштирилади. Шунингдек, ёшларнинг тадбиркорлик лойиҳаларига 250 миллиард сўм субсидия ва компенсациялар берилади», — дейди Шавкат Мирзиёев.
Президентнинг айтишича, айни пайтда уларнинг қишлоқ хўжалиги соҳасидаги фаолиятини ҳам тизимли равишда рағбатлантириб борилади.
«Масалан, Олтиариқ узумчилик кластери намунаси асосида, республикамиздаги 70 та туманда «Ёшлар агрокластери»ни ташкил этиб, 400 минг нафар ёшларни иш билан таъминлаймиз. Вилоят, туман ва шаҳар ҳокимлари ёшлар билан учрашиб, ушбу режаларни ўз ҳудудлари бўйича батафсил муҳокама қилдилар. Энди, ҳар йили ўқув йили якунланиши билан, ёшлар бандлигини таъминлаш бўйича, ҳар бир ҳудуд алоҳида дастур қабул қилади», — дейди президент.
Изоҳ (0)