Фарғона вилоятида «Янги Ўзбекистон ёшлари, бирлашайлик» шиори остида ёшлар фестивали бўлиб ўтди. Мазкур фестивалнинг якуний маросимида иштирок этган «Дарё» мухбири Азизжон Эрматов тадбирнинг эътиборга молик лаҳзаларини суратга олди.
Ёшлар ишлари агентлигининг вилоят бошқармаси ахборот хизмати раҳбари Зарнигор Убайдуллаеванинг маълум қилишича, қарийб бир ой давом этган фестивалда 350 мингга яқин йигит-қиз қатнашган.
«Ёшлар ойлиги» доирасида ташкилланган фестиваль давомида беш босқичли «Беш ташаббус олимпиадаси» ўтказилди. Мазкур олимпиадада маҳаллаларда истиқомат қилувчи 248 минг нафар ёш 15 та йўналиш бўйича иштирок этди.
Беш ташаббус олимпиадаси доирасидаги танлов ва спорт мусобақаларининг республика босқичида Фарғона вилояти жамоалари 4 та олтин, 7 та кумуш, 8 та бронза медалларини қўлга киритди.
Бундан ташқари, 11 та ғолиб жамоа ўзлари истиқомат қиладиган маҳаллаларида спорт майдончалари қурилиши учун махсус сертификатга эга бўлди.
Фарғона шаҳридаги Ислом Каримов номидаги вилоят театр-концерт саройининг очиқ саҳнасида бўлиб ўтган фестиваль ғолибларини тантанали тақдирлаш маросимида вилоятнинг барча шаҳар ва туманларидан келган 2 минг 500 нафардан зиёд ёшлар қатнашди.
Тантанали тақдирлаш маросимида мамлакат миқёсида ўтказилган лойиҳалар, танлов ва спорт мусобақаларида ғолибликни қўлга киритган фарғоналик истеъдодли ёшларга пул мукофотлари ҳамда эсдалик совғалари топширилди.
Отабек Муҳаммадзоҳид, Севинч Мўминова, Сардор Тоиров, «ВИА Мароканд» гуруҳи, Жалолиддин Аҳмадалиев, Асилбек Нигматов каби санъаткорлар иштирокида гала-концерт ўтказилди.
Ёшлар фестивалига гўзал салютлар билан якун ясалди.
Изоҳ (0)