Аввал хабар берилганидек, 25 июнь куни Ўзбекистон Конституциясига ўзгартишлар киритиш тўғрисидаги қонун лойиҳаси жамоатчилик муҳокамасига қўйилди.
Унга кўра, Меҳнатга ҳақ тўлашнинг энг кам миқдори инсоннинг ўзи ва оиласи яшаши учун етарли бўлиши кераклиги (37-модда) Конституцияда қайд этиб қўйилмоқда.
Президент Шавкат Мирзиёев жорий йилнинг 20 июнь куни Конституциявий комиссия аъзолари билан учрашуви доирасида «Асосий қонунимизда ҳар бир шахснинг қулай меҳнат шароитида ишлаш, меҳнати учун муносиб ҳақ олиш ҳуқуқини мустаҳкамлаш, меҳнатга ҳақ тўлашнинг энг кам миқдори инсоннинг ўзи ва оиласи ҳаёт кечириши учун етарли миқдорда бўлишини белгилаш»ни таклиф этди.
Мазкур нормани киритиш зарурияти биринчи ўринда Ўзбекистон учун ўта долзарб бўлган камбағалликни камайтириш ҳамда норасмий меҳнат бозорини бартараф этиш вазифалари билан бевосита боғлиқ. Амалдаги Конституцияда фуқароларнинг энг муҳим ижтимоий-иқтисодий ҳуқуқлари бўлмиш муносиб иш ҳақини олиш ҳуқуқи белгиланмасдан қолиши амалиётда жиддий адолатсизликларга олиб келганига кўп бор гувоҳ бўлинган. Ушбу норманинг бирон бир миллий норматив ҳужжатларда белгиланмагани Ўзбекистонда камбағаллик ва норасмий меҳнат тарқалишига ўз таъсирини кўрсатган, албатта.
Ўзбекистон қонунчилик амалиётида аҳоли турмуш даражасини оширишга қаратилган чора-тадбирлар кўламини кенгайтириш ҳамда фуқароларнинг даромадларини изчил ошириб бориш мақсадида ҳар йили икки марта бюджет ташкилотлари ходмлари учун ойлик иш ҳақиларининг минимал даражасини оширишга қаратилган президент фармонлари чиқади. Чунончи, 2022 йилнинг 1 июндан бошлаб минимал ойлик иш ҳақи миқдори бюджет ташкилотлари учун 12% оширилиб, 920 минг сўмни ташкил қилди. Эслатиб ўтамиз таянч иш ҳақи миқдори 1 июндан 300 минг сўм миқдорида белгиланган.
Изоҳ (0)