Avval xabar berilganidek, 25-iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.
Unga ko‘ra, Mehnatga haq to‘lashning eng kam miqdori insonning o‘zi va oilasi yashashi uchun yetarli bo‘lishi kerakligi (37-modda) Konstitutsiyada qayd etib qo‘yilmoqda.
Prezident Shavkat Mirziyoyev joriy yilning 20-iyun kuni Konstitutsiyaviy komissiya a’zolari bilan uchrashuvi doirasida “Asosiy qonunimizda har bir shaxsning qulay mehnat sharoitida ishlash, mehnati uchun munosib haq olish huquqini mustahkamlash, mehnatga haq to‘lashning eng kam miqdori insonning o‘zi va oilasi hayot kechirishi uchun yetarli miqdorda bo‘lishini belgilash”ni taklif etdi.
Mazkur normani kiritish zaruriyati birinchi o‘rinda O‘zbekiston uchun o‘ta dolzarb bo‘lgan kambag‘allikni kamaytirish hamda norasmiy mehnat bozorini bartaraf etish vazifalari bilan bevosita bog‘liq. Amaldagi Konstitutsiyada fuqarolarning eng muhim ijtimoiy-iqtisodiy huquqlari bo‘lmish munosib ish haqini olish huquqi belgilanmasdan qolishi amaliyotda jiddiy adolatsizliklarga olib kelganiga ko‘p bor guvoh bo‘lingan. Ushbu normaning biron bir milliy normativ hujjatlarda belgilanmagani O‘zbekistonda kambag‘allik va norasmiy mehnat tarqalishiga o‘z ta’sirini ko‘rsatgan, albatta.
O‘zbekiston qonunchilik amaliyotida aholi turmush darajasini oshirishga qaratilgan chora-tadbirlar ko‘lamini kengaytirish hamda fuqarolarning daromadlarini izchil oshirib borish maqsadida har yili ikki marta budjet tashkilotlari xodmlari uchun oylik ish haqilarining minimal darajasini oshirishga qaratilgan prezident farmonlari chiqadi. Chunonchi, 2022-yilning 1-iyundan boshlab minimal oylik ish haqi miqdori budjet tashkilotlari uchun 12% oshirilib, 920 ming so‘mni tashkil qildi. Eslatib o‘tamiz tayanch ish haqi miqdori 1-iyundan 300 ming so‘m miqdorida belgilangan.
Izoh (0)