Бироз аввал Қорақалпоғистон Республикасининг Чимбой туманида IT танлови ғолибига «Пилот» (удлинител, ток узайтгич) совға қилингани ва бу кулгига олингани ҳақида хабар берилганди. «Дарё» мухбири Чимбой туманида бўлиб, ҳолатнинг қўшимча тафсилотларини ўрганди.
Суриштирув аввалида танловни ташкил қилган расмийлардан изоҳ олинди. IT паркнинг Чимбой тумани бўлими менежери Атабек Калмуратов «Дарё» журналистига воқеа тафсилотларини очиқлади.
Унинг айтишича, тармоқларда машҳур бўлган «Пилот» совғаси танловнинг асосий совғаси эмас. Танлов эса энг қуйи босқичда ўтказилган.
«Мазкур танлов 2022 йилнинг 18 июнь куни бўлиб ўтганди. Танловда 60 дан ортиқ мактаб ўқувчиси қатнашди. Ва тўртта ўрин аниқланди. Биринчи ўрин эгасига тўққиз ойлик ўқиш учун 1 миллион 800 минг сўмлик ваучер сертификати берилган бўлса, иккинчи ўринга 1 миллион 200 минг сўмлик ва иккита учинчи ўрин учун 600 минг сўмдан 1 миллион 200 минг сўмлик ваучерлар берилди. Асосий совға шу эди», — дейди Атабек Калмуратов.
Чимбойдаги 15—25 ёшли 60 нафардан зиёд ёшлар орасида чиндан ҳам Мақсим Жумабаев, Мийрибек Айтмуратов, Дамир Аскербаев, Қалмуратов Азаматлар ғолиб ва совриндорлар қаторида тақдирланган.
Танловда «Пилот» олганлар икки нафар бўлган.
Дамир Аскербаев ва Азамат Қалмуратовлар «IT билимдони» танловининг туман босқичида 3-ўринни эгаллаган. Ижтимоий тармоқларда машҳур бўлган йигитнинг исми эса Азамат Қалмуратов. У тумандаги 39-мактабда ўқийди. Азамат биз билан суҳбатда барчаси қандай бўлгани, ўзига берилган ўша «машҳур совға» ҳақида гапириб берди.
«‘Пилот’ менга берилган совғанинг қўшимчаси эди. Менга учинчи ўрин учун 600 минг сўмлик ваучер сертификати берилганди. Шахсан мен учун бу совға айни муддао бўлди», — дейди Азамат Қалмуратов.
Эслатиб ўтамиз, аввалроқ Алишер Саъдуллаев мазкур ҳолатга эътибор қаратиб, танловнинг туман босқичида учинчи ўринни қўлга киритган икки нафар болага Ёшлар ишлари агентлиги, Чимбой тумани ҳокимлиги ва бошқа мутасадди ташкилотлар томонидан биттадан комютер совға қилинганини айтгани хабар берилганди.
Изоҳ (0)