Самарқанд вилоятининг Жомбой туманида содир бўлган йўл-транспорт ҳодисаси оқибатида бир йўловчи ҳалок бўлди, деб хабар беради вилоят ИИБ ахборот хизмати.
Маълум қилинишича, 13 июнь куни Сарича—Қанғли—Бойбағиш автомобиль йўлида катта тезликда ҳаракатланган Nexia автомобили бошқарувни йўқотиб, йўл четидаги дарахтга урилган.
Авария оқибатида автомобиль ичида йўловчи сифатида келаётган 52 ёшли аёл оғир тан жароҳатлари билан шифохонага ётқизилган. Кўрсатилган тез тиббий ёрдамга қарамасдан жабрланувчи шифохонада вафот этган.
Ўлим билан боғлиқ мазкур ЙТҲ юзасидан «Қанғли» МФЙда вилоят ИИБ Жамоат хавфсизлиги хизмати Йўл ҳаракати хавфсизлиги бошқармаси ходимлари, кенг жамоатчилик вакиллари ва маҳалла аҳли иштирокида муҳокама бўлиб ўтган.
Аввалроқ Наманганда MAN билан тўқнашган «Жигули»нинг олд қисми бутунлай пачоқланиб кетгани, Самарқандда тез ёрдам машинаси ва «Жигули» тўқнашиб кетгани, Қашқадарёда «ЗИЛ» ва Nexia иштирокида содир бўлган ЙТҲ оқибатида йўловчи вафот этгани, Самарқандда Damas 9 ёшли болани уриб кетиб, ҳаётига зомин бўлгани тўғрисида хабар берилганди.
Изоҳ (0)