U-23 Осиё Кубоги финалига чипта сотиб олиш учун узун навбатлар юзага келди. 25 минг сўмлик чипта «қўлда» 200 минг, марказий жойлар 500 минг сўмга сотилмоқда (видео)

U-23 Осиё Кубоги—2022 финали доирасидаги Ўзбекистон — Саудия Арабистони учрашувига чипталар 17 июнь куни «Бунёдкор» стадиони кассаларида сотувга чиқди.

Чиптахона атрофида минглаб мухлислар тўпланган. Маълумотларга кўра, кассаларда фақат дарвоза орти секторларига чипталар сотилмоқда. Нарх — 25 минг сўм. Ҳар бир кишига кўпи билан бешта чипта сотилмоқда. Бу ҳақда «Дарё» мухбири хабар қилмоқда.

Кўплаб чипталар «қўлга» чиқиб кетган. Кассада 25 минг сўмлик чипталар «қўлда» 100—150 минг, ҳатто 200 минг сўмдан сотиляпти. Яна бир чайқовчи марказий сектордаги чиптани 500 минг сўмга баҳолаган.

«Дарё» мухбирининг айтишича, 17:30 га келиб, чиптахоналар ёпилган. Чайқовчилар эса ҳеч қандай тақиқсиз чипта олиб-сотиш билан шуғулланяпти.

Аввалроқ чипталар электрон шаклда ҳам сотувга чиқиши хабар қилинганди.