Россия Молия вазирлиги янги санкциялар хавфида холи бўлиш мақсадида бюджет ҳисобдорлиги бўйича маълумотларнинг муайян қисмини эълон қилишни тақиқлади. Бу ҳақда вазирликдаги манбага таяниб, «РИА Новости» хабар берган.
АҚШ, Европа иттифоқи, Буюк Британия ва Россияга дўст бўлмаган бошқа хориж мамлакатлар, муайян шахслар томонидан босимнинг ортиб кетаётгани туфайли бюджет ҳисобдорлигини шакллантиришга оид айрим ахборотларни тарқатиш қисман чекланди. Бу қўшимча санкциялар эҳтимолини камайтиришга ёрдам беради.
«РИА Новости» нашрининг қайд этишича 14 июнь куни Россия Молия вазирлиги бюджет даромадлари, харажатлар ва бюджет профицити миқдорини эълон қилган, 2022 йилнинг беш ойи давомида тахминий ҳисоб-китоблар бўйича Россияда бюджет профицити 1,495 триллион рублни ташкил этган.
Вазирлик бюджет дефицитини молиялаштириш манбалари ҳақидаги маълумотни, бюджет ва давлат дастурлари ижроси учун харажатлар, шунингдек, аввалги ойларда бюджет ижроси учун сарфланган пуллар миқдорини ошкор қилмаган.
The Bell нашри Россия Молия вазирлигининг апрель ойидаги статистикасида мамлакатнинг нефть-газ даромадлари йиллик ҳисобда 18 фоизга қисқаргани, «Миллий мудофаа» бўлими учун сарф-харажатлар эса апрель билан таққослаганда 130 фоизга ортганини қайд этган.
Май бошида Россия Молия вазирлиги санкцияларга учраган ёки тақиқлар хавфи остида турган юридик шахслар тўғрисидаги маълумотларни эълон қилмаслик, улар ҳақидаги ахборотларни чеклаш таклифини билдирган.
Изоҳ (0)