Қорақалпоғистон Республикаси экология қўмитаси ва «Қорақалпоғистон экологияси» газетаси томонидан экожурналист ва блогерлар учун медиатур ташкил этилди. «Дарё» мухбири ҳам уч кун давомида ҳудуднинг бир қанча нуқталарида бўлиб, репортаж тайёрлади.
Медиатур мобайнида ОАВ вакиллари 2020 йили ташкил этилган «Жанубий Устюрт» миллий табиат боғи таркибига кирувчи Қоплонқир чинкида ҳам бўлди. Қўнғирот тумани ҳудудидаги Қоплонқир чинки Ўзбекистон, Қозоғистон ва Туркманистон давлатлари ўртасида жойлашган. Ушбу манзилга бориш учун Нукус халқаро аэропортидан 420 километр масофани босиб ўтиш керак.
Қорақалпоғистонлик журналист Эсимхон Қаноатовнинг қайд этишича, «Жанубий Устюрт» миллий табиат боғининг умумий майдони 1 447 143 гектар бўлиб, бу жойлар муҳофаза этиладиган табиий ҳудудлар мақомига эга. Бу ерга илмий мақсадлар учун махсус рухсатнома билан кириш мумкин. Сайёҳ сифатида ташриф буюриш эса тақиқланган.
«Қоплонқир Устюртнинг жанубида жойлашган. Қоплонқир чинки Ўзбекистон, Қозоғистон ва Туркманистон давлатлари ўртасида шимол-ғарбдан жанубга қараб 190 километрга чўзилган.
Мазкур ҳудуд кўриниши жиҳатидан ажралиб туради, баланд-баланд чинклар, бепоён кенгликлари кўрган инсонларни ўзига маҳлиё этади. «Қоплонқир» дея номланишига сабаб бу ерларда ўтган асрнинг 30-40 йилларида қоплонлар яшаган. Улар териси учун овланиб, бугунги кунгача қирилиб кетган.
Туркманистонда Қоплонқир қўриқхонаси фаолият кўрсатади. У Устюрт платосининг жанубий чеккасида, Туркманистоннинг шимолидаги Тошовуз вилоятида жойлашган. Қўриқхона 1979 йилда маҳаллий ўсимлик ва ҳайвонот дунёсини муҳофаза қилиш ва тиклаш учун яратилган. У биринчи навбатда, Устюрт тоғ қўйлари, жайрони ва Шимолий Туркманистон ҳайвонот дунёсининг бошқа вакилларини ҳимоя қилиш ва тиклаш учун ташкил этилган», — дейди Эсимхон Қаноатов.
Сафаримиз давомида жайронлар, қулонлар ва тошбақаларни кўришга муваффақ бўлдик.
Миролим Исажонов,
Тошкент—Қорақалпоғистон—Тошкент
Изоҳ (0)