Наталья Поклонская Россия Федерацияси бош прокурори Игорь Красновнинг маслаҳатчиси лавозимига тайинланганини маълум қилди.
«Мен ижтимоий саҳифаларимни юритишни ва ҳар қандай оммавий фаолиятни тўхтатаман. Энди ‘Россия Федерацияси прокуратураси тўғрисидаъги Федерал қонунга мувофиқ Россия бош прокурори томонидан қўйилган вазифаларни бажариш билан шуғулланаман», — деди Поклонская.
Қримнинг собиқ прокурори ва Давлат думаси депутати, аввал «Россотрудничество» раҳбари ўринбосари лавозимида ишлаган Наталья Поклонская, Россиянинг Украинага қарши урушини очиқчасига танқид қилган деярли ягона россиялик амалдор бўлди. 13 июнь куни унинг «Россотрудничество» раҳбари ўринбосари лавозимидан бўшатилгани хабар қилинди.
Украинада уруш бошланганидан сўнг, Поклонская Россия босқинини «фалокат» деб атаган, руслар ва украиналикларни «бир-бирига нисбатан нафрат қўзғатадиган бу жинниликни тўхтатишга» чақирган ҳамда З ҳарфи Россия босқинининг асосий белгисига айланганини — бу «Россия учун ҳам, Украина учун ҳам фожиа ва қайғу» эканини айтган.
Наталья Поклонская — асли Украинанинг Ворошиловград (Луганск) вилоятидан. Унинг туғилган қишлоғи 2014 йилдан кейин ЛХР назорати остига ўтди. Поклонская болалигиданоқ Қримда яшаган. У прокуратурада ишлаган, Қрим Россияга қўшилганидан кейин Қрим прокурори бўлган. Украинада Поклонская давлатга хиёнатда айбланган.
Изоҳ (0)