Тез ва осон: таом тайёрлашни ёқимли машғулотга айлантиришга ёрдам берадиган лайфхаклар

AdMe нашри вақтингизни тежайдиган ва севимли таомларингизни янада мазали тайёрлаш бўйича маслаҳатлар тўпламини тайёрлади.

Тухумни картошка эзгич билан осон майдалаш мумкин

Агар қайнатилган тухумни майдалашингиз керак бўлса, масалан, пирог ёки салат учун, пичоқни олишга шошилманг. Ишингиз картошка майдалагич билан анча тез ва осон битади. Асосийси, жуда майдаланиб кетмаслиги учун уни ҳаддан ташқари кўп эзманг.

Қуймоқ хамирини суши таёқчаси ёрдамида бир текис тақсимлаш мумкин

Қуймоқ хамирини товага бир текис ва юпқа қилиб ёйиш қийин бўлиши мумкин. Мукаммал юмалоқ шаклдаги қуймоқ чиқиши учун суши таёқчасини эгиб, хамир устидан юргизинг.

Лимонни қирғичдан осонгина чиқариш учун аввал музлатиш керак

Лимон пўсти соус ва коктейллардан тортиб овқат ва пишириқларгача бўлган кўплаб таомларнинг машҳур таркибий қисмидир. Аччиқроқ оқ қатламга тегмасдан устидаги пўстини осонгина майдалаш учун лимонни музлатинг. Бундан ташқари, лимонад тайёрлашни яхши кўрсангиз, музлатиб, эритилган цитрус мевалардан шарбат чиқариш эҳтимоли кўпроқ эканини унутманг.

Сариёғни юмшатиш учун микротўлқинли печдан кўра сув ҳаммомидан фойдаланган маъқул

Баъзан музлаткичдаги сариёғни зудлик билан юмшатиш керак бўлади. Бундай пайтларда сариёғни микротўлқинли печда эритгандан кўра идишга солиб, сув ҳаммомига қўйиш яхшироқ ечим бўлади.

Қўлдаги пиёз ҳидини хом картошка ёрдамида осонгина кетказиш мумкин

Пиёз тўғралгандан кейин дуч келинадиган муаммо — бу терида қоладиган ва қўлларни совун билан қайта-қайта ювгандан кейин ҳам йўқолмайдиган ўткир ҳид. Бироқ бунинг йўли бор: пиёз ҳидини кетказиш учун бир бўлак хом картошкани бармоқларингизга суртинг.

Тухум яхшироқ арчилиши учун уларни қайнатиш эмас, балки печда пиширган маъқул

Кўпчилик тухумни силлиқ арчолмай, жиғибийрон бўлади. Яхшиямки, бу муаммонинг ечими бор. Печни 160 даражага қиздириб, тухумни кекс идишига солинг ва 30 дақиқа давомида пиширинг. Кейин 10 дақиқага совуқ сувга солиб қўйинг.

Тухумни пўстлоғидан осон тозалаш учун қайнаётганда идишга бир бўлак лимон солинг

Агар кўпроқ тухум пиширишингиз керак бўлса-ю, печ бўлмаса, бунинг бошқа усули ҳам бор: пишириш пайтида идишга бир бўлак лимон солинг. Натижада тухум пўстидан осонгина ажралади.

Пиёз кўзингизни ёшламаслиги учун уни музлаткичда совитинг

Бунинг учун пиёзни совиткичга 30 дақиқага қўйиш ёки музхонасида 15 дақиқа музлатиш мумкин. Натижада пиёз суви билан бирга ажраладиган моддалар зарарсизланади ва кўз ёши тўкилишига сабаб бўлмайди.