Tojik-qirg‘iz chegarasida yuz bergan navbatdagi otishma oqibatida tojikistonlik muddatli harbiy xizmatchi halok bo‘ldi, deb xabar bermoqda “Aziya-Plyus”.
Nashr qayd etishicha, bugun, 14-iyun kuni ertalab Isfara shahrining Vorus jamoati markazidan 10 km masofada joylashgan Ko‘h qishlog‘ida Tojikiston va Qirg‘iziston chegarachilari o‘rtasida otishma boshlangan.
“Otishma davom etmoqda,… qurbon bor — muddatli askar. Hozirda kasalxona yaradorlarni qabul qilishga tayyorlanmoqda”, — deyiladi xabarda.
Tojikiston rasmiy hukumati hodisa yuzasidan izoh berganicha yo‘q.
Qirg‘izistoning Botken viloyati ma’muriyati “Interfaks”ga ma’lum qilishicha, Tojikiston hukumati Qirg‘izistondagi Vorux anklavidan o‘z fuqarolarini evakuatsiya qilishni boshlagan.
“Taxminan 9:25 da (Toshkent vaqti bilan 8:25) Voruxdan Tojikiston fuqarolarini evakuatsiya qilish boshlandi”, — dedi viloyat ma’muriyati vakili.
Uning so‘zlariga ko‘ra, Tojikiston tomoni otishmadan keyin Botken tumanidagi Samarkandek, Chon-Talaa, Ko‘ktosh qishloqlarida chegara qismlarini kuchaytirishni boshlagan.
Eslatib o‘tamiz, bugun, 14-iyun kuni ertalab Qirg‘iziston va Tojikiston chegarasida otishma yuz berdi, Tojikiston tomoni granatomyot va minomyotlarni qo‘lladi. Chegaraning qirg‘iz-tojik qismidagi vaziyat keskin deb tavsiflandi.
Qirg‘iziston va Tojikiston chegarasi vaqti-vaqti bilan ikki mamlakat mahalliy aholisi va chegarachilari o‘rtasidagi nizolar hududiga aylanib turadi. Bunga sabab delimitatsiya qilinmagan yerlar bo‘lib, u yerlarda davlatlar o‘rtasidagi chegara qayerdan o‘tishini aniqlab bo‘lmaydi.
Izoh (0)