Давлат хавфсизлик хизматининг Фарғона вилояти бўйича бошқармаси ҳамда вилоят ИИБ ходимлари саъй-ҳаракати билан диний экстремистик оқимлар таъсирига тушиб қолган ёшларнинг ноқонуний хатти-ҳаракатларига чек қўйилди. Бу ҳақда ЎзА хабар қилди.
Қўқон шаҳрида яшовчи, 2001 йилда туғилган М.О. ўзининг Samsung Galaxy А31 телефони орқали Telegram мессенжерида аккаунт очиб, Ўзбекистон давлат тузумини конституцияга хилоф тарзда ўзгартиришга қаратилган, ақидапарастлик ғоялари билан йўғрилган ҳамда «Ўзбекистон ислом ҳаракати» террористик ташкилотига тегишли бўлган диний материалларни яқинларига тарқатиб келган.
Фарғона шаҳрида яшовчи, 2000 йилда туғилган Қ.Б. эса Instagram ижтимоий тармоғидаги ўз профилига ақидапарастлик ғояларини тарғиб қилувчи видеолар, маърузалар ва жиҳод қилиш ҳақидаги овозли матнларни жойлаб, ўзининг виртуал обуначиларига тарғиб қилиб келган.
Иккала ҳолат юзасидан Вазирлар Маҳкамаси ҳузуридаги Дин ишлари бўйича қўмита берган хулосаларга кўра, ушбу шахслардан олинган материалларни Ўзбекистон Республикаси ҳудудига олиб кириш, тайёрлаш ва тарқатиш тақиқланади.
Эндиликда уларнинг хатти-ҳаракатларига ҳуқуқий баҳо берилади.
Изоҳ (0)