Тошкент шаҳар Мирзо Улуғбек туманида 10 июнь куни кўп қаватли уйда ёнғин содир бўлди. Бу ҳақда Фавқулодда вазиятлар вазирлиги хабар қилди.
Қайд этилишича, шу куни соат 15:20 ларда Мирзо Улуғбек тумани Лашкар кўчасида жойлашган кўп квартирали уй хонадонларининг бирида ёнғин содир бўлаётгани тўғрисида шаҳар ФВБга хабар келиб тушган. Шунга кўра, 4 та ёнғин-қутқарув экипажи соат 15:26 да воқеа жойига етиб борган. Ёнғин соат 15:30 да қуршаб олинган ва соат 15:39 да ўчирилган.
Ёнғинда кўп квартирали уй юқори қавати йўлагида уй жиҳозлари ёниб зарарланган. Қутқарувчилар томонидан икки нафар фуқаронинг ҳаёти сақлаб қолинган.
Ҳодиса оқибатида тан жароҳати олган ва ҳалок бўлганлар йўқ. Ҳозирда ёнғиннинг келиб чиқиш сабаби ва моддий зарар миқдори аниқланмоқда.
Аввалроқ Бухорода ёнаётган уйдан фуқаро қутқариб қолингани, Тошкентда ИИБ ходими ёнғин бўлаётган уйда қолиб кетган касал аёлнинг ҳаётини сақлаб қолгани ҳақида хабар берилганди.
Изоҳ (0)