Конституциянинг никоҳга оид бандига ўзгартириш киритиш таклифи билдирилди
Ўзбекистон конституциясининг 63-моддасидаги бандга ўзгартириш киритиш таклифи билдирилди. Бу ҳақда 10 июнь куни бўлиб ўтган Конституциявий комиссия йиғилишида комиссия аъзоси Тўлқин Каримов айтиб ўтди.
Тўлқин Каримовнинг таъкидлашича, 63-моддадаги бандни ўзгартириш муҳим аҳамиятга эга.
«Жойларда ўтказилган учрашувларимизда конституциямизнинг 63-моддаси, яъни оилага бағишланган моддасига тааллуқли жуда кўп таклифлар берилди. Шундан келиб чиқиб, 63 - моддадаги «никоҳ томонларнинг ихтиёрий розилиги ва тенг ҳуқуқлилигига асосланади», деган бандни, «никоҳ аёл ва эркакнинг ихтиёрий розилиги ва тенг ҳуқуқлилигига асосланади», деб қайд этиш таклифи бўлди», — деди у.
Маълум қилинишича, мазкур модда ўзгартирилса, Оила кодексининг 2-моддасини ҳам ўзгартириш керак бўлади. Яъни кодексда сўзлар эркак ва аёл тартибида ёзилган, конституцияда эса улар ўрни алмаштирилиб — аёл ва эркак дейилмоқда.
Йиғилишда Конституциявий комиссия раиси ўринбосари Алишер Қодиров 63-моддага томонлар сўз ўрнига аёл ва эркак сўзларининг киритилиши жуда яхши таклиф эканини айтди.
«Жамоатчилик томонидан мазкур бандни ўзгартириш фикрини қўллаб-қувватланиши жуда муҳим. Ҳатто кўп учрашувларда айтяпмиз, бундан 7-10 йил олдин ҳам бу кескинлик йўқ эди. Конституциямизда мана шунга ўхшаган бир таҳдидий ҳолат бор эканига биз унча эътибор бермаганмиз. Яъни томонларнинг деганда, биз ҳозир ғарб дунёсида тез ривожланиб кетаётган ўша бир жинсли никоҳларни афсус билан айтишимиз керак. Уларда бу нарсага қонун даражасида, ҳатто конституцияларида рухсат берилди. Ва биз мана бу аниқ белгилаб кетаётганимиз нормани маънавий меросимиз ва қадриятларимизни ҳимоя қилиш тимсоли сифатида кўришимиз керак. Таклифни тўлиқ қўллаб- қувватлайман» — деди «Миллий тикланиш» партияси раиси.
