Самарқандда сомон ортилган юк машинаси ёниб кетди (видео)

Самарқанд вилоятининг Ургут туманида меъёридан ортиқ сомон ортиб кетаётган машина электр симларига тегиб кетиши оқибатида ёнғин юзага келди.

Вилоят ИИБ матбуот хизмати хабарига кўра, воқеа 9 июнь куни соат 10:00 ларда туманнинг «Гулистон» МФЙ ҳудудида юз берган. Ҳайдовчи «ЗИЛ» юк машинасига меъёрлардан ортиқ баландликда сомон ортгани учун ҳаракатланиб кетаётган вақтида электр тармоқларидаги симларга тегиб қолган.

Шундан сўнг улар электр симини тепага кўтармоқчи бўлганида қисқа туташув ҳамда чақнаш содир бўлиб, транспорт воситасига ортилган 400 дона сомон преси ёниб кетган.

Самарқанд ФВБ матбуот хизматининг маълум қилишича, 2 та ёнғин-қутқарув экипажи воқеа жойига соат 10:11 да етиб бориб, ёнғин соат 10:15 да қуршаб олинган ва соат 10:50 да бартараф этилган.

Ҳодиса оқибатида жароҳат олганлар йўқ. Ҳолат юзасидан терговга қадар текширув ҳаракатлари олиб борилмоқда.