Шавкат Мирзиёев ва Эмомали Раҳмон тор доирада учрашув ўтказди

Шавкат Мирзиёев ва Тожикистон президенти Эмомали Раҳмон 2 июнь куни тор доирада учрашув ўтказди. Бу ҳақда Президент матбуот хизмати хабар қилди.

Қайд этилишича, давлат раҳбарлари Ўзбекистон—Тожикистон ҳамкорлигини кенгайтириш масалаларини муҳокама қилган. Музокараларда асосий эътибор икки томонлама алоқаларни мустаҳкамлаш, сиёсий, парламентлараро, савдо-иқтисодий, транспорт-логистика, инвестициявий ва маданий-гуманитар ҳамкорликнинг кун тартибини кенгайтириш масалаларига қаратилган.

Давлат раҳбарлари кўп қиррали Ўзбекистон—Тожикистон стратегик шериклигини янада ривожлантириш йўлидан қатъий боришларини тасдиқлаган. Савдони фаол кенгайтириш ва саноат кооперациясини кучайтириш, икки мамлакатнинг логистика ва транзит имкониятларини ривожлантириш ҳамда сув энергетикаси лойиҳаларини амалга ошириш орқали муносабатларни янги амалий мазмун билан бойитишга тайёр эканини билдирган.

Минтақавий ва халқаро кун тартиби юзасидан фикр алмашилган. Марказий Осиёда тинчлик ва барқарорликни таъминлаш масалалари муҳокама қилинган. Кўп томонлама тузилмалар доирасидаги ўзаро манфаатли ҳамкорликни давом эттиришга томонларнинг интилиши қатъий экани таъкидланган.

31 май куни Шавкат Мирзиёевнинг таклифига биноан Тожикистон президенти Эмомали Раҳмон жорий йил 2—3 июнь кунлари расмий ташриф билан Ўзбекистонда бўлиши ҳақида хабар берилди.

Эмомали Раҳмон 2 июнь куни эрталаб Тошкентга етиб келди. У йўловчи рейсларини бажарувчи самолётдан фойдаланган. «Спутник Тожикистон»нинг қайд этишича, Тожикистон раҳбари бюджет пулларини иқтисод қилиш учун шахсий самолёт сотиб олишни истамаган.

Тошкент халқаро аэропортида уни президент Шавкат Мирзиёев кутиб олган. Етакчилар ўртасида қисқа суҳбат бўлиб ўтган.

Сўнг Кўксаройда Эмомали Раҳмонни расмий кутиб олиш маросими ўтказилган. Маросимда икки мамлакат расмий делегациялари аъзолари ҳам иштирок этган.